美股上周五食瀉藥，昨日亞洲區股市低開在預期之內，港股亦唔好得去邊，恒指低開四百點後，最低曾見21,010點，午後A股止跌回升，恒指乘勢收窄跌幅，埋單報21,309點，跌154點，主板成交774億元。

雖然昨日即市和收市指數均未有失守兩萬一關口，但必須提防議息前後，橫跨商品、匯市、股市仍有機會先來一次集體洗白白，之後才出現較大型的冚倉潮，現階段短線操作好淡都兩難。

昨現貨收市後初段，期指變動不大，日市收報21,310點，幾乎平水。顯見好友唔爭在等多陣，淡友亦唔傾向呢一刻再加倉。理論上，議息過後，本月已過一半，唔少基金大戶已放假過聖誕。

如果議息後沒有出現跨市場洗白白場面，月底前市況可能會繼續沉靜，但恒指本月至今波幅又似乎未夠班炒家胃口。睇昨日A股尾市發圍，呢鋪又會唔會係阿爺打救，不妨等着瞧！