新興市場成為近日市場重災區，油價急跌一成，創近一年最大跌幅同時創下六年半低位，垃圾企業債暴跌，令市場避險情緒升溫，連同鐵礦石及金價，路透CRB商品指數已創近十三年低位。

南非總統祖馬（Jacob Zuma）閃電換走財政部長Nhlanhla Nene，接任人係國會議員David Van Rooyen。南非係黃金生產大國，全球金價低迷令當地生產商叫苦連天。

金商因禍得福

南非經濟唔好唔係今日先知，第三季國內經濟增長GDP只得0.7%，即勉強叫做「保 1」! 失業率高達25.5%，呢個數據比起部分歐豬國家更高，而評級機構亦先後將南非的前景展望下調，評級只比垃圾級別高一級，發債成本提升，企業經營更難上加難。經濟差，炒咗個財政部長都好合理，問題是繼任人David Van Rooyen乃何方神聖？

自歐債危機後大部分經濟唔好的國家都換晒政治班底，希望博一博單車變摩托。但今次市場明顯擔心新不如舊，可以做的並唔係用腳投票，而係不停沽出南非蘭特投下不信任票，難怪南非蘭特已跌至歷史低位。

不過，講番轉頭，因為南非黃金生產商開採成本以蘭特計價，但出售黃金就可以收到美元，美元兌南非蘭特跌穿歷史低位，反而令當地生產商股價因禍得福，其中Harmony Gold Mining就創出十六年新高。