低息供樓年代或將結束！美國「零息時代」持續七年，香港業主亦變相享受了多年的低息供樓蜜月期。然而，本周美國勢將公布加息，一旦展開加息周期，香港業主的供樓負擔便一再加重。究竟按揭利息加幾多，業主才會呻苦？不如由各方業主貼身分享。

「息魔」就快殺到，難免對一眾業主帶來影響。

黃嘉俊 怕失業多過加息

Rosatta 平價上車無壓力

Cola 或要搵兼職幫補

林偉雄 加到四厘先入肉

黃嘉俊：怕失業多過加息

中國北方證券副總裁黃嘉俊於今年六月以1,400萬元買入丁屋，承做五成按揭，現時月供近4萬元。他表示，供了數期就要面臨加息，幸好預期加幅不大，大約供多2,000元。他指，美國現時的經濟環境未必允許持續加息，「不停加息的可能性非常低，因為美元資產會因而被拖低，而商品價格又仍然低迷，想加息都加唔到。」

雖然預期美國加息步伐緩慢，惟息口達致某水平都令業主手緊。黃嘉俊表示，「如果美息加到去三至四厘，相信九成香港人，包括我自己都大叫救命。不過，最擔心的都係驚無咗份工唔夠錢供樓，加息加幾多實際影響不大。」

Rosatta：平價上車無壓力

業主Rosatta早於十年前與老公一起買入屯門居屋單位，當年樓價不足100萬元，雖然承造九成按揭，也只是月供6,000元。她直言，慶幸當年及早置業，能夠食正樓價升勢，同時亦享受多年的低息蜜月期，故即使加息，對她生活影響不大。

「我同先生一齊供樓，月供6,000元與家庭入息水平有距離，供樓負擔佔入息不足兩成，所以加幾多息對我哋都無咩大影響，而且依家息口仲係好低，所以會留多啲現金作投資。」

Cola：或要搵兼職幫補

業主Cola於一三年盡慳上車，以首期約30萬元買下一個279萬元的油麻地單位，月供9,500元。對於今次美國即將加息，Cola直言感到擔心，「每加0.25厘就每月供多300元左右，但如果按息加到3厘，每月變相加多1,000元就開始有壓力。」

她表示，雖然買樓前已預計加息後的供款情況，惟仍然希望不要如上次加息期的步伐一樣快，一旦按息加至5厘就更擔心，「如果按息加到5厘就供多成4,000元，要做多份兼職先能夠支持生活開支。」

林偉雄：加到四厘先入肉

晉裕環球投資研究部董事林偉雄於四年前買入北角一單位自住，每月供款1.8萬元，坦言供樓佔入息不高，即使美國宣布加息0.25厘，而港銀又跟隨的話，暫時影響不大。

惟他於○二年首次做業主，曾經歷過○四至○六年17次加息，深深明白加息對業主之苦，「當年我都係供萬多元一個月，但入息無而家咁多，所以當時加息真係有啲壓力，好彩樓價不停升，仲令到我可以樓換樓。」

林偉雄認為，今輪美國加息唔同往日，加息速度亦不及之前那樣快，「就算今次加0.5厘，對我影響唔係太大，供款約加多近千元。不過，如果加息好似之前○四年咁，加多2厘，即按息升至4.15厘就真係入肉啦。」