呢幾年政府不斷主動推地，推高住宅施工數字，睇番屋宇署最新數字，十月份施工單位有1,165伙，雖然按月減少咗約22.8%，但唔覺唔覺已連續五個月破千伙，今年頭十個月累積施工量更高達15,111伙，已經係近八年新高。另十月份有19個項目獲批建築圖則，比較大型嘅有億京荃灣楊屋道住宅及酒店項目、同埋領展（00823）觀塘鴻業街商業發展。

政府頻谷供應，十月份施工單位有1165伙，已連續五個月逾千伙。（資料圖片）

荃灣楊屋道住宅及酒店項目，獲批建築圖則。

十月份部分獲批建築圖則

劉Sir參考屋宇署最新資料，十月私宅施工量約1,165伙，連續五個月穩企逾千伙水平，頭十個月累積施工數字，更比舊年同期多咗約2.37倍，創近八年新高。

落成量月減30%未追上

不過，落成量就未能反映政府加快供應情況，十月有約1,121伙落成，按月少咗約30.8%，而頭十個月落成量亦只有10,041伙，比舊年同期少咗約莫18.3%，佔全年預測約75.6%。

再有政府主動批出的大型發展獲批建築圖則，劉Sir知道，該署喺十月批出咗19份建築圖則，包括3項住宅及商住發展，最有規模係億京上年投得嘅荃灣楊屋道項目，准喺2層平台或1層地庫之上，興建3幢29至31層高住宅樓宇，另設1幢41層高酒店，整個項目總樓面加埋約莫107.57萬方呎，酒店佔咗約65.2萬方呎。

此外，宏安（01222）今年年頭投得嘅沙田大埔公路─大圍段住宅項目，亦都獲批建1幢13層高分層住宅。而資本策略地產中環己連拿利3至4號亦准建1幢26層高商住樓宇。

觀塘商廈准建21層高

此外，十月份亦有12項商業發展獲批圖則，最有分量係領展（00823）今年一月奪得嘅觀塘鴻業街、偉業街、順業街與海濱道交界商業項目，批建1幢21層高商廈，另設3層地庫，總樓面達約88.39萬方呎。

另信置（00083）上年投得嘅觀塘市中心重建計劃第二及三發展區，市建局早排向城規會提出增加項目伙數去到1,999伙，比最初方案多17.6%，規劃署唔反對，相信今個禮拜五可以順利過關。另葵涌屈臣氏中心申請全幢改裝電視及電影製作室、寫字樓等用途，規劃署亦唔反對申請。