港股連跌七個交易日，恒指周五再跌240點，並失守21,500點關口，收報21,464點，國企指數亦跌142點，收報9,308點，全日成交金額683億元。

通達為中國品牌手機的主要外殼供應商，具有市場優勢。（資料圖片）

事實上，以小時圖嚟睇，恒指技術上已出現底背馳，照計隨時會有反彈，但係人行最新公布的十一月新增貸款只有7,089億元人民幣，低於市場預期，加上上周美股急挫，睇嚟港股今日的形勢並不樂觀。

事實上港股周五氣氛甚差，主板有1,112隻股票下跌，升的只有278隻，仲有126隻股份創一年新低。而且好多實力有番咁上下的股份，都失驚無神大插，好似隻金風科技（02208）就跌12%，敏華控股（01999）亦跌11%。

港股難改連跌頹勢

事實上，近日大市交投淡靜，投資者入市意欲已經唔大，周五又整單復星董事長郭廣昌失聯消息，系內在港兩間公司復星國際（00656）及復星醫藥（02196）均告停牌。今次事件明顯對市場構成負面影響，就連關連股份國藥控股（01099）亦要捱沽，周五跌6.7%以30.6元收市，港股要終止連日下跌的勢頭，實在相當困難。

近日不少新股上市，但好多首日已經潛水，唔使跌已經算有交代，有得升更加叫強。上周五首日在主板掛牌的天寶集團（01979），就令投資者喜出望外，在跌市之下，股價較招股價0.55元升121%，最後更以接近全日高位1.22元收市。天寶為內地開關電源、充電器及控制器製造商，業務未算太有睇頭，股價表現如此突出，相信與貨源有關，所以投資者宜見好就收。

通達集團（00698）截至九月底止九個月，錄得營業額43億元，按年升31%，增長主要來自手機業務，期內集團獲得來自國內領先手機品牌的訂單。目前，內地智能電話生產商正尋求將金屬外殼引入中低端手機型號，而通達為中國品牌低端手機的主要外殼供應商，而且擁有固定的客戶基礎，故有一定優勢。

此外，集團擬分拆手提及平板電腦外殼製造業務上市，有望成為刺激股價上升的催化劑。通達周五逆市升2.22%，以1.38元收市，成交亦見配合，由於其股價自上月底以來反覆下調，料在分拆憧憬下可繼續反彈，不妨小敲。