外圍跌佢跌，外圍升唔跟，早已成為港股常態，挾在中國經濟無起色同美國即將加息的暴風眼之間，大市一蹶不振，恒指連跌七日，上周五收報21,464點，跌240點，主板成交不足七百億元。踏入今年倒數階段，年中「高興過一陣」的中港股票基金，睇怕都要打定輸數，年終個市都返唔到一四年底的23,605點，交唔到數睇怕已成定局。

風電股近期整體受壓，金風跌至現水平已具吸引力。（資料圖片）

回帶睇番九月期指結算後的交易日，開始一輪挾淡急升，恒指由20,368升到23,423點，合共3,055點，上周五收市計，大市已將反彈升幅逾六成跌番出街。對比之下，國指情況更差，由9,058點彈上10,884點，共1,826點，周五收9,308點，僅僅差250點返到起步位，期間反彈累積的逾八成升幅已化為烏有。跌成咁，揭示十月中過後，國企股沽壓要比傳統藍籌更重。

外資信心未恢復

那邊廂，阿爺暴力救市，表面上A股穩定落嚟，但九萬幾樣限制，唔單止股指期貨半拉閘，成交今非昔比，三不五時券商高層被查失蹤，雖然話今日叻到鳴金收兵，重啟IPO，但從H股走勢之弱，可見大部分外資基金見過鬼都怕黑，信心根本未恢復。

不過，股市有句說話「buy on rumor sell on fact」，簡單講係趁謠言（或市場預期）出現時買入，變成事實時沽出。本周聯儲局加息九成九無走雞，不妨睇睇，一四年開始進入上升周期的美匯指數，早兩星期見企唔住100，率先掉轉頭炒，落番97至98之間，今浪港股以至一眾新興市場走資潮，會唔會在美國第一次加息落實後得以喘息，來個技術反彈，照睇機會未可完全抹殺。若短期個市嚟一次短途挾淡倉，周中議息前後可能性比較大。

早排講過，玩得中資股就要有中國特色的政治風險準備，上周復星國際（00656）主席郭廣昌「失聯」，在事情水落石出前，系內兩間公司仲可以高掛免戰牌，避過一跌，但郭廣昌與復星持有中港兩地多間公司股份，大都插水收場，民生銀行（01988）跌1.3%，筆者心水之一的國藥控股（01099）也躺着中槍，無端端隊6.7%。今次事件最後未知點收科，但撇開復星因素，30元邊的國藥老實講又幾吸引。

渣打集團（02888）連60元都頂唔住，上周五跌1%，收59.6元。渣打的大折讓七供二結果出龍，得九成七股份獲認購，老實講，近排新興市場唔啱芬佬嘴形，股價近兩個多月，80元、70元關接連失守，如今60元都穿埋，散戶喊驚唔供唔出奇。

渣打有條件冷敲

自從六月新任CEO溫拓思坐正，渣打股價跌咗一半，市值唔見咗近二千億，但呢位對沖基金出身的掌舵人都算巴閉，大刀闊斧裁人，仲將老舊問題一次過揭晒出嚟，如今供完股股價跌到過晒火，反而有小小扒冷門味道。

大市上周五下挫，新能源股亦要捱沽，龍源電力（00916）跌4.5%，金風科技（02208）更跌12.3%，以11.56元收市。事實上，國家日益重視環保，新能源行業前景理應睇高一線，但近日大市偏軟，加上內地十一月份風資源較弱，令電企出現風電場利用時數下跌的情況，故周五以風電股的沽壓尤為沉重。

金風十月下旬由17元以上水平反覆回落，以周五收市價計，個半月累跌超過三成，初步已反映風電場利用時數減少及風電價格下跌的因素。事實上，集團第三季純利在撇除一次性項目後，按年仍錄得逾兩成升幅。在憧憬電力發電機組銷售錄得升幅下，相信全年盈利表現不俗。

集團近日公布獲安邦保險集團透過旗下和諧健康、安邦養老及安邦人壽，購入合共1.37億股A股，可見機構投資者對公司的認同。以周五收市價計，金風往績市盈率13倍，吸引力回復，而且股價已跌近一年低位，不妨趁股價回落至11元或以下水平作中線吸納。