隔晚美股腳軟，港股衰多二錢重，連跌六日，成個市睇實下周二、三美國聯儲局一連兩日的議息會議，大環境，加息已經係梗局，關鍵反而係加完之後，份聲明點樣演繹嚟緊一月及三月兩次例會的可能變動，假如只係加一次再睇定先，已反映加息因素的港股，有機會來個超賣反彈，假如暗示經濟好到可以再出手，咁港股後市就真係no eye see！

美國經濟穩步復甦，利好創科電動工具銷情。（資料圖片）

太陽日誌 2015/12/11

尋日個市都算蠱惑，恒指朝早開21,714點，好快已經見到買盤掃上，最高見21,880點，以為早市打好個底會試番高少少，點知十點過後，個市靜過鬼，大戶買意不足，個指數浸浸落。兩點過後，恒指最低落到21,668點，最後跌99點，收21,704點，主板成交得689億元，點數睇落跌得唔算甘，但過千隻股票見紅，有進帳僅四百多，氣氛都幾差。

油價未有耐見底

國際油價跌到37美元邊，三桶油打瀉晒，中石油（00857）及中石化（00386）仲見埋五十二周低，跌1.1%及2.1%，收5.17及4.46元，中海油（00883）跌2.9%，收報8.17元。從來商品市場癲起嚟同衰起上嚟，都可以過晒火位，弱美元加埋中國在海嘯前的粗放型經濟增長，推動國際油價突破每桶140美元，時移世易，今日連「零頭」都唔夠。

油價幾時可以見底？睇國際環境似乎未有耐，今次油價跌浪，成因複雜，強美元、中國經濟失速錯估新增需求、美國頁岩氣冒起成石油淨出口國、俄羅斯出口增加、OPEC成員貌合神離、沙特財困堅拒減產，令OPEC漸失油價操控能力等等。唔好話40美元，即使油價番到60美元，眾多海灣產油國都通通入不敷支，全部陷入財赤，靠變賣家當及發債度日。

有句話叫愈窮愈見鬼，尤其海灣國使慣歎慣，要勒緊褲頭，講就容易。睇番沙特仲有相當於總產量一成六的閒置產能，如果肯短痛減產，相信仲可以托得一時三刻，但市場係反應最快的投票機器，睇番上星期OPEC開會後油價愈隊愈深，似乎更多人相信，產油二世祖會選擇過得一日得一日，如同歲晚清倉，要錢唔要貨。

在「一帶一路」概念下，基建股曾經是市場寵兒，據《經濟參考報》報道，鐵路「十三五」規劃已經編制完成，期間全國新建鐵路不低於2.3萬公里，總投資不低於2.8萬億元人民幣。

雖然中央大力支持基建投資，但對基建鐵路股刺激有限，股價自十月以來反覆下跌，昨日中交建 （01800）再跌4%，以8.16元收市，已跌穿七月八日股災日低位，至於中鐵 （00390）亦跌5.22%，失守6元關，以5.99元收市，中鐵建 （01186）相對較強，昨日股價僅跌1.73%，以10.18元收市。

中鐵建難守10元

中鐵建走勢強於另外兩隻基建股，主要是集團正分拆中鐵建高新裝備 （01786）上市，加上日前宣布中標近93.8億元人民幣的巴基斯坦公路項目，故對股價帶來支持，惟在板塊氣氛整體偏淡下，相信中鐵建要守住10元大關難度甚高。

中國經濟未有起色，美國卻一枝獨秀，叻到有條件加息，經濟進入穩定復甦周期，受惠呢個環境的本地股票唔多，最具代表性的，一定係七成生意都來自美國，主攻裝修家居必備的電動工具生產商創科（00669）。今年專賣自家翻修家居用具的連鎖店Home Depot（美股:HD），股價累升26%，而關連性頗大的創科都升20%，即使直接比較升幅唔多合適，但至少可見創科有條件脫離港股氛圍的泥沼。

今年上半年，創科之營業額及收入分別升10%及16%，至24.74億及1.59億美元，主要是由於佔總收入七成九的電動工具，錄得16.7%的增長，反而地板護理及器具較失色，營業額及溢利分別減少9.7%及17.5%，尚好是不足以影響整體數字。

預測創科今年全年賺3.5億美元，明年4.23億美元，一六年市盈率16.7倍，以未來兩年約20%年增長，現價中線有吸引力。還有一點未完全發酵的利好因素，是公司以美元收入為主，而生產成本不少以人民幣計價，人民幣進入貶值期的話，對創科有一定的好處。