近排陸續有統計話細單位供應創新高，不過發展商一於冇有怕，市建局深水埗海壇街需求主導項目尋日截標，一共接獲8份標書，符合市場預期。另方面，新地（00016）天榮站項目亦申請縮則，令伙數增加超過兩成至1,938伙。

市建局深水埗海壇街項目昨截標，反應符合市場預期。（資料圖片）

建灝地產林綺華稱，海壇街項目規模較小，發展成本高，出價較保守。

信置代表到場入標。

市建局海壇街項目資料

細單位供應增加，但係都冇嚇怕發展商，深水埗海壇街205至211A號需求主導重建項目尋日截標，市區重建局公布，共收到8份標書。

長實信置宏安等競逐

多間近年有拎到區內市建項目嘅發展商，好似係長實地產（01113）、英皇國際（00163）及遠東發展（00035）都有入標。另外，信置（00083）、宏安（01222）、百利保（00617）同建灝地產等發展商都有入標項目。

呢個地盤只係提供69伙，仲規定至少一半單位係實用面積唔可以超過480方呎嘅細單位，市場原本都預期唔會收超過10份標書，今次招標反應都算唔錯。遠展地產發展部總經理朱寶林話，公司同區有發展經驗會有協同效應，出價會進取。

不過，建灝地產行政經理林綺華就話，項目規模較細，成本較高，所以出價會審慎啲。該項目市場估值約1.72億至2.21億，平均每方呎樓面地價估值約4,500至5,760元。

新地亦都睇好中小型單位市場，最近向城規會申請將今年二月買返嚟嘅天水圍天榮站項目縮則，單位平均面積由613方呎縮細到506方呎，伙數由原本1,600伙增加至1,938伙，增幅有21%。

用家主導 細宅仍睇好

劉Sir老友理想城市張聖典話，用家負擔能力有限，唔少發展商都覺得細單位市場中短線仍有支持。張翹楚就話，新盤市場主要係由上車用家主導，而近排環球經濟環境多不穩定因素，對同豪宅買家影響較大，細單位對發展商係比較穩陣選擇。

另外，嘉民集團或有關公司建議將粉嶺樂業路17號開達工業中心整幢改裝做商店同食肆，提供超過20萬方呎樓面。