近排個市猶如一場五比零大局已定的足球賽事最尾幾分鐘垃圾時間般，一副買賣兩閒等運到的模樣，睇好的，對十二月中議息投鼠忌器，要睇淡，又礙於A股及美股勢頭唔錯，外圍配合唔到，結果22,000點唔想穿，23,000點又鞭長莫及，波幅愈玩愈窄。

最衰見識過十一月假傳聖旨，深港通假開車消息都可以挾七、八百點的瘋狂，連想做認購認沽期權短倉賭「縮窩」，都形同雞胡牌走去博人哋爆棚，相當制唔過。

昨日恒指高低波幅158點，十二月期指因開市價出奇地偏低，結果有229點波幅，撇開早市的輕微錯價，十點後期指高低位22,484及22,334點，得150點上落，成交縮至9.9萬張，如斯市況，除咗靜靜坐住舊盤之外，玩即市隨時係做多錯多。

牛皮待變格局未改，成本價22,400點樓上的三分一注淡倉，繼續保持不加注不亂去止蝕的策略，靜候市況出現真正突破。