今年舖市大逆轉，核心區舖位租金在短時間內插水式下跌，令到一眾業界人士都話「大跌眼鏡」。有老友代理同劉Sir講，今年初估計核心區舖租都係跌約莫10%，但直至依家，已經累積大跌30%，估計明年跌勢可望喘定，跌幅放緩到10至15%。

零售市道淡，尖沙咀等核心區舖位租金插水式下跌。（資料圖片）

袁志光（左三）估計明年租金跌勢「喘定」。

第一太平戴維斯副董事總經理袁志光同劉Sir講，年初原先預計今年一線街舖租金會跌10%，但依家睇返，實際上街舖租金已經「插水式下跌」，跌幅高達30%，遠遠高過預期，主要因為主打遊客生意嘅商戶「做唔到生意」，更出現退租個案，而新租戶亦「畀唔起舊租金」，所以租金就大跌。

另外由於跌租速度快，估計好快就會「喘定」，預計明年再跌約10至15%；而街舖售價今年已經跌咗20%，但大部分街舖業主喺早年購入舖位，持貨力比較強，相信明年舖價跌幅較細。

另一方面，太子珠寶鐘錶主席鄧鉅明同劉Sir講，佢哋集團承租緊嘅尖沙咀海防道同樂道交界地舖，將會喺明年四月到期，依家仲同業主傾緊續租，詳情就不便透露。

尖沙咀新租嗌貴30%

聽講上述舖位已經重新喺市場上放租，新叫租約300萬元，較現租金高出30%。而同區廣東道由名牌眼鏡店承租嘅雙號舖位，租約明年中到期，依家亦喺市場放租，叫租逾300萬元，遠高於現租金。

袁志光又話，今年低估咗中環甲級寫字樓租金升幅，年初預計該區租金最多升5%，但新近調整預測數字至全年上升11%，預計明年再升5至10%；而整體甲廈租金料今年全年升8%，明年升5%。

新蒲崗工廈3.5億洽

至於住宅方面，佢就話，今年本港整體住宅樓價料有單位數跌幅，因為第四季各發展商以貼近區內二手價推盤，料未來數年將會有大量供應，預計明年樓價下調5至10%。

有消息話，新蒲崗三祝街10號正華工業大廈全幢，面積約9.67萬方呎，獲買家以約3.5億元洽購。美聯商業李家馴話，觀塘海濱道181號商廈One Harbour Square兩層低層戶交吉放售，面積同約18,314平方呎，意向價均約為2.05億元。