Fundman睇市：電力股短線博反彈

唔單止中國PMI舉足輕重，今個禮拜被喻為金融市場相當重要的一周，美國有感恩節後「黑色星期五」和「網購星期一」零售表現，昨晚IMF傾人民幣「入籃」，今日中國PMI，周三歐央行傾加碼量寬，周四和周五美國就業數據，高潮一個接一個。但除咗中國PMI較難估外，其他好似已相當篤定，就如「入籃」已八九不離十。

雖然板上釘釘，但市場如何反應卻有很大變數，所以市場視「入籃」為不明朗因素，多過中長線利好因素，近期見人仔緩慢貶值，相對於「811」三日內急貶而言，現下慢貶對市場殺傷力細得多。不過，慢貶同快貶一樣係貶，假如人仔一年內貶超過3%，以國內業務為主的公司估值又會下降。

券商股宜炒上落

港股要睇外圍，但MSCI中國指數收市後換成分股才是昨日之主題曲，全日走勢亦相當波動，雖然兩度轉跌為升，惟最後個零鐘頭又急轉直下逾200點，結果埋單要跌72點，成交更逾千億元。不過，因阿里巴巴等加入故比重降低的騰訊（00700）仍升0.7%，並非拖累大市的元凶，兩隻內險股成藍籌跌幅榜首兩位。

A股亦走勢反覆，滬綜指微升0.28%，總計十一月升1.9%，雖然同十月相比，升幅差一大截，主要係上周五之一跌幾乎一舖清袋。而上周五券商被查的疑慮，原來證實又係查兩融業務，之前市傳出到稽查大隊立案，估計會係大鑊嘢，現在變成小事而已。

中證監剛宣布券商自營業務解禁，但搞笑係券商卻反而表態話直至4,500點前都不沽貨，大有表忠誠的味道。券商咁識做相信是怯於證監淫威，就以今次監管風暴而言，券商高層有帶走、有失聯、有自殺，搞到人心惶惶，現在最緊要和氣生財。

券商股風光過、低沉過，未來亦肯定高不過五月、低不過九月，睇位炒上落最實際。經過上周五一役，監管風暴相信暫從「高位回落」，券商股因此有喘息空間，但A股走勢仍相當難估，或許高不成、低不就，惟短線肯定睇實下星期幾隻IPO，相信反應仍會相當墟冚，券商股短線博反彈是機會也。

明年下半年話會落實註冊制，IPO數目會大幅上升，另外會實施新三板分層制；對券商股而言，商機猶在。不過，現在講明年已顯得遙遠（雖然只有1個月），十二月甚至本星期已可能有大變化，淨係入籃、歐洲加碼量寬及美國加息已好唔得閒，大部分股友現階段都只爭朝夕，長揸？咪搞！

吸引力稍勝內銀

尋日4隻電力H股及紅籌股創52周新低，A股則仍見上升。之前吹電力改革，電力AH股均炒至興合合，但H股自十月二十三日開始如斷線風箏般，當日市傳上網電價下調消息成轉捩點。

不過，減電費近年已有兩次，未如今次般反應激烈，況且煤炭成本一直下降，幾大電力股今年PE得5倍幾，買來收息都不弱於內銀股。既然電力股與內銀股現時無論市盈率及周息率均相當接近，雖然業務性質風馬牛不相及，但何妨比較一下投資價值。

內銀股今年盈利甚可能出現倒退，且不良貸款直線上升，無增長甚至負增長的公司自然要配上低估值。至於電力股今年仍普遍取得不俗增長，明年若電費下調固然是負面，電改容許直接購電其實亦是負面，正面因素是煤炭成本及減息後利息成本亦降低。

不過，電力股低迷很大程度是反映對中國經濟的悲觀態度，發電量近年不斷下降，由工業向服務業轉型，可見未來只有更差、沒有最差，相反煤炭成本和利息成本再降空間有限。

內銀和電力股前景均不足取，但華能（00902）自十月二十三日起累計跌28%，潤電（00836）則累跌22.8%，短線博反彈似乎以電力股較宜，而且每次減電費幅度其實都小於預期，話晒係公用股，風險度亦較內銀股小。