上周軟件股有異動，之後帶動動漫及網遊股氣氛，上周五華夏動漫（01566）、博雅互動（00434）及IGG（00799）分別升6至12%，龍頭互聯網股騰訊（00700）升上155.1元收市。上落市短炒，策略係見到人氣夠就跟啲，有雞胡都照食，總之密食當三番，唔洗太傷腦筋！

本月底IMF開會討論人民幣納入SDR議案，相信成事機會高，若然係有得炒，照計本周就會有動靜。上周五尾市恒指轉跌為升抽高逾兩百點，係唔係預演，不得而知，但睇主板成交得644億元，則唔多像樣。如果本周魚缸都係悶局一場，就要等十二月中聯儲局會議後，先至會再有明確方向。

十二月除了要關注美息去向之外，人民幣會否再來一次貶值亦係焦點，故短期還是避開航空股及內需股，留意出口股博反彈機會。

負面因素已反映

個股方面，高偉電子（01415）上周五股價靜極思動，突破4元關，高位見4.35元，收報4.28元，成交增至近4,500萬元。今年三月上市的高偉主要做智能手機相關模組，與瑞聲科技（02018）屬同類股。近幾年蘋果公司智能電話大賣，但能達到其高規格要求供應配件的公司並不多，瑞聲同高偉係其中兩間，後者研發設於南韓，廠房則設於內地東莞。

對比業績，今年首九個月瑞聲純利同比增長37%至20億元人民幣；今年首六個月，高偉純利增長1.7倍至2,646萬美元。雖然業務規模有別，但亦因為基數較細的關係，高偉的增長動力較大。但當然，如今大家都關注iPhone銷情最輝煌的日子已成過去，作為供應商亦會受到壓力，風險因素不容忽視。

高偉三月上市的招股價為每股4.25元，即係如今已重上水面。睇瑞聲股價經已去番次季高位，但高偉則仍然低迷，相信係同基金股東沽貨有關，惟料相關因素已作反映，追落後唔係冇條件，再加上上周似乎有資金為翻炒科網股試水溫，不妨留意搭順風車的機會，惟3.8元支持不宜有失。