雖然內地放聲氣話要重啟IPO，但A股不跌反升，滬綜指突破3,600點，收報3,646點，升1.58%。不過，港股仍舊弱勢，恒指跌逾百點收場，國指亦低收作結，表現令人失望，某程度反映外資對A股升市仍然缺乏信心。

由中國海外（00688）分拆以介紹形式上市的中海物業（02669），上月二十三日上市以來，股價反覆向上，昨日高位曾見1.81元，收報1.8元，升16%，成交達5億元，呢期新股真係佢至威！昨日掛牌的中金公司（03908）高位曾見11.44元，收報11.04元，較招股價10.28元高7%，反正離招股價不遠，睇好內地金融市場表現，呢隻股都值得關注。

內地文化產業概念投資熱潮不斷升溫，見到昨日個別相關股份亦有異動，就如新華文軒（00811），股價一度搶到上7.69元，收報7.58元，升16%，成交大增至逾5,400萬元。呢類股最大的憧憬，係炒被巨型科網企業睇中入股，但當然，炒十隻未必有一、兩隻可以成事，所以短炒策略都係盡量走即日鮮。

呢期A股唔單止內地券商股翻生，就連內銀股表現都幾唔錯，昨日中信行（00998）的A股便漲停板，而其H股則升1.7%，收報5.25元。經歷救市一役，重磅的內銀股街貨已盡落國家隊手中，不妨順勢留意內銀股表現，其中光大銀行（06818）首九個月賺238億元人民幣，按年增長2.3%，老實講，論基本數據，呢隻股唔係一線內銀，但見昨日股價逆市上升，成交增加。若然板塊氣氛持續升溫，光大銀行呢浪主要阻力在4.25至4.4元區域，失守3.7元止蝕。