Fundman睇市：中海油服反彈睇10元

尋日恒指抽上23,342點，最多升774點，唔單止現貨成交重上千億水平，十一月期指14.2萬張成交，計落合約值1,650億，超出主板成交近五成。港股七、八月插水之後，非轉倉的日子，確實好耐無見過咁大場面，一葉知秋，可見大戶口講唔當深港通一回事，但見到消息突然殺到，都選擇信住先，現貨買唔夠，掃期指戥住個倉，否則無貨撞啱大升市就閉翳。

港股升上去之後無因為人行澄清打回原形，睇嚟掃貨大戶都有兩手準備，預咗深港通無下文的話，最遲月底IMF公布的SDR，都會轉返轉有散貨機會。

國策反覆玩死芬佬

數返近期個市，穩陣可以落鑊的故事真係唔多，「十三五」雷聲大雨點少，創新及產業提升，通通係長線國家發展策略，對於今年保七，明年保六五，恐怕是鞭長莫及。二孩政策概念威得一個上晝，就夠令人心灰。

但史提芬最失望的，仲係阿爺一面講話經濟的可持續發展，一陣又健康中國，要同環境污染開戰，正路一切有關環保、新能源，協助減少污染的行業，多多少少都應該長遠分享到國策傾斜帶來的好處，但話口未完，發改委的《關於完善陸上風電、光伏發電上網標杆電價政策的通知》，準備二○一六年起調低光伏上網電價，光伏股被基金質到阿媽都唔認得，好似連插幾日的金風（02208），尋日大升市死貓彈維持得半日，收市幾乎又打回原形。

人人都知，無規範的污染環境好容易，講環保成本高好多，可再生能源好似水電、太陽能及風電等，在煤炭多到用唔晒的中國，發電成本實在難與火電匹敵，國家理應作為一個主導角色，提供補貼。依家口講減排，轉頭又要減光電電價，這類情況愈常發生，投資市場對阿爺政策執行的決心及延續性，肯定打個折扣，難怪近年國策股整體估值有愈玩愈縮的趨勢，唔好話普通股民，咁落去就連芬佬都畀阿爺玩謝，高呼怕怕。

德國銀行業一哥德意志銀行，近半世紀首次叫停派息，為補充資本籌謀，話口未完，輪到久聞樓梯響要伸手的渣打（02888），選擇供股集資，同時宣布第三季稅前溢利見紅兼大裁員。

屈指一算金融海嘯轉眼已八年，跨國銀行生意唔單止無好轉，在環球經濟疲弱，收入增長無驚喜，兼且要符合巴塞爾三的資本規定，大型銀行景況確實淒涼。渣打高層預期七供二集資近400億後，渣打普通股的一級資本比率會升至13.1%，達到該行目標12至13%的上限。

渣打股東幾大都供

渣打現價一五市帳率0.59倍，比海嘯低位0.74倍仲要平兩成，以供股作價約55.6元計，相當於0.41倍市帳率，即使海嘯後，大型銀行長期低估值可能成為未來常態，但四折加注機會罕有，小股東無理由要放棄供股，最多等未來市況好番些少，先沽最後押入的兩注出去。

國際油價仍未斷氣，紐約期油隔晚升3.8%，收報47.9美元，雖然是由於巴西石油工人罷工及美國主要輸送管道停運等「短期因素」使然，但近期走勢卻是「點止補倉咁簡單」。

今年油價經常大幅波動，但大部分時間都於40至50美元之間上落，40美元已經是「鑽石底」，石油輸出國組織預測明年需求將告復甦，是否如此還看中國經濟，惟亦可說油價已在今年見底。

石油股及油服股亦隨油價反彈，中海油（00883）昨更升5.35%。當然，兩個板塊今年上半年業績已受重大損害，但由第四季開始可望「止跌」，皆因去年同期基數亦同樣地低，明年的基數更低，假如需求真的出現反彈，石油股便具盈利復甦概念。

「三桶油」合併的機會其實微乎其微，「十三五」規劃更話到加快開放能源在內的壟斷性行業競爭，油價上升除石油和油服股直接受惠之外，作為替代能源的天然氣亦得益，因價格差距將會收窄。

不過，傳聞中的「氣價調整」卻一拖再拖，現在就話延至年底，但隨時再延至明年初，中央可能對近期甚為波動的油價亦需再行觀察。中海油服（02883）首九個月盈利大幅下跌81%，主要由於是經營環境困難而需作出資產減值，股價在7.5元建雙底後，現價不過反彈一成多，仍可視10元關口為短期反彈目標。