本來中港兩地魚缸仍是一潭死水，但受到人行網站文章引述行長周小川話「今年還要推出深港通」的消息提振，重燃市場對年內深港通啟動的希望，好友借勢上攻，恒指尋日最高搶到上23,342點，終於打破悶局！

但冷不防中午卻傳來人行澄清，指有關言論實為五月講話，即係「開玩笑」﹗下午開市前相信唔少好友聞言後心情由高峰跌落谷底，午後一開市肯反手沽的話，可以輕輕鬆鬆贏兩百點走人。但奇怪係，午後A股唔肯回仲要繼續升，而港股落到23,000點亦現承接，全日成交仲增加至1,120億元。

呢個現象，證明真係有錢泊喺香港等最佳時候入場買貨，雖然昨日的烏龍文章由放上人行網站到出來澄清，實在太兒戲，嚴格而言以一家央行向市場發放訊息，這樣出錯直頭「離譜」，但其實人民幣要入SDR，內地金融市場進一步開放係必然的，深港通唔係年底前推都會在明年上半年推。反觀，見滬港通推出接近一年，表現遜預期，深港通推出後會唔會有突破？反正平常心，沒太大期望自然唔會太過失望。

券商股不宜高追

兩地金融股受誤報深港通消息提振，普遍有半成至一成升幅。不過，筆者唔建議高追，因為內地金融業打貪行動去到一半路，唔知仲有咩消息跟尾，而深港通實際上要明年先至通車，呢轉券商股炒作唔排除都係一、兩日貨仔。若然昨日上午未有入場，都係靜觀其變為妙。

反觀，「十三五」要扶持多個戰略產業，「互聯網+」是其中一瓣重點，投資中國市場的股票組合，必然會沾手呢個板塊。類似的大型科技軟件股如金山軟件（03888），現價18.62元，較五十二周高位回落46%，往績市盈率22倍，有留意價值。

今年上半年公司進行移動轉型、全球化以及「ALL-INCLOUD」戰略，相信今年大力投資移動業務及雲業務的策略，可為長期增長奠下良好基礎，實力投資者可分注作中長線收集。

走勢上，昨日金山軟件股價隨大市向上，成交大增至4.88億元，短線較大阻力在250日線20.65元，中線應該唔難上番22至23元水平，初步支持在16.5元。