Fundman睇市：李寧具短炒條件

前晚華爾街在議息後的表現，只能夠用個亂字去形容，道道指由消息公布後倒跌25點，到尾市拗腰狂抽，以接近高位收市，升198點。今次聯儲局主席耶倫並無在議息後開記招解畫，大家只能從議息聲明刪減了有關外圍經濟情況窒礙美國經濟發展的字眼，解讀認為係聯儲局想藉淡化外圍經濟衝擊，提出更強烈加息信號，十二月出招的大門還未關上，看來十月及十一月的非農職位增長，將是十二月中議息探水溫的最指標性寒暑表。

港股調整機會高

從利率期貨顯示，十二月美國加息的機會率，由開會前的34%飆升至46%，前晚美匯指數即時衝上97.86，創超過兩個月新高，紐約期油勁彈6.4%或2.78美元，收46.17美元，到底博聯儲局拖得就拖，唔加息住的股市因乜事咁興奮？在下實在唔想夾硬搵理由，總之睇多日至講。

港股動力減弱是不爭事實，尋日個市高開後，10日線掂一掂又再失守，埋單計跌136點，收22,819點，考慮到上周先係人行雙降，到如今聯儲局唔加息住，港股都係咁樣樣，嚟緊一個月，淨係得人民幣申請加入SDR一個消息落鑊，而且個個估「成功爭取」機會好大，似乎短期好消息出盡之下，港股先來一次似樣調整，落番一千幾百點試一試下面支持的機會唔細。

國壽（02628）第三季業績差過預期，股價跌5.4%收28.7元。至於中電信（00728）季績盈利升13.6%好過預期，加埋花旗、美銀美林與大摩齊唱好，但都無用，埋單要跌2.8%收4.07元，近三星期以來首次低於10日線收，走勢有轉弱迹象。

二三線較為搶眼的，是準備向大股東黃光裕買入非上市資產，結果有價講的國美（00493），作價由112.68億打八一折落到去90.95億，尋日股價升0.16元，收1.48元，計落市值單日暴漲12.1%，計入大股東本身持股，以及交易牽涉的55億股新股及25億份認股證，左計右計，減價其實都係除笨有精。

隨着年輕勞動力開始進入衰減期，中國面對高齡人口比例增加的問題，眾望所歸下，昨日五中全會確認允許二孩政策全國實施，其實尋日已經見合生元（01112）、現代牧業（01117）及好孩子（01086）都有偷步迹象，只係蒙牛（02319）、雅士利（01230）兩母子跟唔上。

二孩概念股落鑊

上次單獨二胎雷聲大雨點小，事實國家政策下，符合單獨二胎夫婦1,100萬，結果首年申請超生僅得145萬宗。一三年底追政策炒的股民焦頭爛額，國家生育單位亦都急急變陣，換上二孩政策，今次潛在新生人口較單獨二胎多得多，相信點都會有一陣子炒吓。除奶粉、嬰兒服飾之外，主打網上教育的網龍（00777）不妨留意，有鑊氣都可以跟。

體育用品股去庫存縮門市的工作，過去兩年都做得八八九九，大部分業績都回到康莊大道，安踏（02020）股價屢創新高，惟獨李寧（02331）高層換人後，半年業績虧損收窄，但早排畀高盛出報告話第三季訂單轉弱，目標價下調到4.7元。

賓架耍手擰頭，一來李寧業績本身未得，而且自體操王子整多間非凡中國（08032）之後，畀人玩財技、唔「專心」的印象，啱啱兩間公司有個交易，非凡中國斥資1.25億元人民幣向李寧收購乒乓球及羽毛球器材相當出名的上海紅雙喜一成股權。成單刁，表面純粹左手交右手，2331依然係紅雙喜大股東，只不過未來唔再以附屬公司形式入帳（去年賺9,419萬）。

自問從來都睇唔通呢系咩嘢葫蘆賣咩藥，但從交易睇到兩件事，一係主理人想揼現金入2331，其次即使係非經常性項目，但交易都會帶來2億出售收益，可以粉飾年終條大數。橫睇掂睇2331都無乜蝕底，尋日股價發難，如果成交對辦，應該有短炒條件。