Fundman睇市：國藥現價諗得過

手執本文，看官應該已知美國議息結果，睇相佬呃你十年八年，年初問十個經濟師，九個都話年底前美國一定加息，但史提芬一早就已經睇死聯儲局，走數話都無咁易。

經過多次量寬，華爾街對流動性的需索程度，如同癮君子對毒品一樣，一四年九月同一五年七月，單是加息預期，股市已經出現過兩次自己嚇自己的人踩人慘劇，在通脹偏低，聯儲又對金融市場的激烈反應投鼠忌器，已經陷入放水容易退市難的地步，日本是上世紀的最佳例子，依家就輪到美國。

聯儲局陷入兩難

今年聯儲局主席耶倫一直口硬，表現出點都加一次先算的態度，不過睇外圍，日、歐過去一年的量寬，唔夠皮之餘，近期已傾緊再擴大規模，上周中國加入雙降放水，一年息低於通脹，正式進入負利率年代。

全球主要國家鬥印錢放水、鬥匯率貶值，講到底都係想將衰退及通縮出口，美國睇住自己盤數，經濟火車頭復甦速度尚算可以，但要拉郁歐、日、中國及一眾新興市場，真係談何容易？事實在一四年美元表現一枝獨秀，逆轉成為強勢貨幣之後，美國通脹已經維持在偏低水平，好聽講，係有較大彈性畀聯儲局維持低息多一陣子，但事實美國一旦確認息口回升，美元匯價肯定再飆升，到時跌入通縮，唔通又掉轉頭放水咁兒戲咩！

聯儲局依家係加又死唔加又死，拖拖拉拉咁多年，伯南克年代訂下低於6.5%失業率出手的承諾，早就拋諸腦後，話加唔加，固然公信力掃地，但在債市預示只得三分一機會加息的情況下夾硬來，一個唔小心，搞死股債市出現骨牌式崩盤，多年救市努力恐將毁於一旦。

基金靠邊站，尋日港股成交縮到得610億，恒指跌186點，收22,956點，經過十月初的挾淡倉及基金補貨，踏入十月中，港股成交愈玩愈縮，「十三五」炒到水尾，人行雙降都出埋，短期無故事落鑊，基金大戶一副提早年底盤點的姿態。

一睇尋日七隻藍籌逆市向上，有電能（00006）、港鐵（00066）及煤氣（00003）三隻公用股在內，多少感受到閒錢多焗住入市的基金苦況。盛傳「十三五」會研究重啟互聯網彩票及發出更多牌照，彩票股如華彩控股（01371）、中彩網通（08071）及第一視頻（00082），在已是散檔一樣的市況下，成為罕有見炒味的奇葩。

恒大健康炒出事

升得快，跌得仲快，炒貨乾升到個個都唔信的恒大健康（00708），尋日股價創過2.35元新高之後，山泥傾瀉一樣，倒插27.5%或0.62元，收1.63元，炒家終於樂極生悲，連帶馬雲系的阿里健康（00241）都拖埋落水，隊2.5%收6.14元。

一隻轉型十畫得一兩撇，另一隻啱啱在網上藥品銷售起步，盤數未有耐見得人，兩隻股票市值唔細，高位跌一截都仲有194億同514億元，反而近期見慢火煎魚拾級而上的國藥（01099），更加啱嘴形。

國藥首三季業績，純利升32.6%至28.4億元（人民幣．下同），期內營業額則升16%至1,698.1億，盈利增長較中期的30.6%擴大。面對醫改壓力，部分省份對藥品價格打壓力度唔輕，醫藥生產商收入增幅放緩，但相對其他暮氣沉沉行業，醫療產業還是比較標青。國藥過去幾年併購效果漸現，規模效益改善，管理費用開支率下降，交出比對行業平均為佳的盈利增長動力。

國藥是內地藥品及醫療保健產品最大的分銷及零售商。中國人口老化，估計二○二○年全國60歲以上高齡人口達2.48億，醫療需求龐大，近期盛傳五中全會將把「健康中國」寫入文件，提升至國家戰略層面，推動醫療產業達到10萬億市場規模。更重要係，國藥一六年預期市盈率16.7倍，幾乎貼實上市以來15.5至58倍的下限水平，以未來兩年預期盈利增長約兩成計，國藥現價都幾吸引。