呢幾年細單位新盤當道，加埋限「發水」條例實施後，建築成本貴咗，新盤車位嘅供應減少，導致「僧多粥少」，車位就愈賣愈貴。劉Sir睇番今年推售嘅新盤，發現多個新盤嘅車位供應都極少，愈接近市區嘅新盤，車位供應愈少，個別市區新盤住戶與車位嘅比例更高達18比1，即平均18戶爭1個車位。

旺角SKYPARK提供約439伙住宅單位，但僅得24個住客車位。

劉Sir統計咗今年推售嘅11個新盤，其中新世界（00017）旺角嘅SKYPARK提供439伙，但只係提供24個住客車位，住戶與車位比例係18比1，另近期熱賣嘅九龍建業（00034）紅磡環海．東岸，有單位1,008伙，但僅提供58個住客車位，住戶與車位比例約莫係17比1。

濱南車位一年貴45%

事實上，呢兩個屋苑嘅同區二手車位做價就屢創新高。

有代理話，紅磡海濱南岸車位做價由170至200萬元，其中3樓一個雙號車位之前以200萬元賣咗，創項目新高，一年升值約45%。

另有代理指，目前旺角區嘅車位做價約莫200至250萬元。

劉Sir知道，政府自從二○一一年四月起實施限「發水」條例，限制新批圖則嘅車位停車場面積，喺地面或地下起停車場分別可獲批50%或100%嘅樓面寬免，地面停車場嘅其中一半樓面就要喺總建築樓面扣減，好多發展商都唔願犧牲樓面，但地庫起停車場成本又會貴好多，所以近幾年新盤的車位數量通常都起夠數就算，車位唔多，往往就可以賣個好價錢，助長車位炒風。

沙中拆售下月收票

理想城市企業估值部主管張聖典同劉Sir講，依家政府普遍根據要求興建指定要求嘅車位數目，唔會特別增加車位供應，另於地底興建停車場的管理費相對較貴，但因為免地價，扣埋建築成本，基本上都係無得輸。佢仲話，新盤車位供應少，車位價格炒高並唔出奇。

另宏安地產營業及拓展董事黃耀雄稱，旗下沙田中心一籃子車位將於十二月完成交易，屆時會推出共137個車位拆售，而下月會開始收票及宣傳。消息透露，該批車位售價約130萬至140萬元。另世紀21日昇黃文龍稱，天后海都洋樓4樓單號車位以170萬元沽出，創屋苑車位售價新高，原業主於九四年以47萬元購入車位。