延續前日高開低收的走勢，昨恒指最低見過22,885點，試穿10日線，惟午後跌幅愈收愈窄，最後倒升26點收23,142點，走勢有即日完成短期調整的味道，可惜主板成交實在奀，得690億元。

走勢上，好友多少應補回一部分的好倉在手，惟主觀上，筆者都係選擇睇多一兩日，或者等埋明晚美國議息後市場反應先算。周四結算的十月期指，昨以23,129點開出後，最低見過22,894點，幾乎完全回補周一因人行雙降開高所遺下的裂口底部，之後期指跟隨現貨收復失地，最高見23,150點，當現貨收市後，食胡盤滲出使低水幅度再擴大，日市收23,070點，成交13萬張，十一月期指收23,075點，成交5.4萬張。

九月期指低位殺盡好友，十月大市掉頭炒，好友大獲全勝，本月結算前期指大戶力托賺盡的誘因唔細，故昨日現貨低成交下大市倒升，筆者認為對後市啟示作用較低。