自從九月期指結算，基金在第四季開初急攻，因應外圍對美國短期加息的預期降溫，港股從九月底低位，作報復式反彈，估唔到阿爺好心做壞事，將利好氣氛終止。

上周五人行雙降，五中全會昨日開幕，A股反高潮一度倒跌，港股亦叻唔到去邊，恒指穿頭破腳，最終倒跌35點收23,116點，主板成交僅728億元。毫無疑問，昨日現貨市場成交配合唔到升勢，基金大戶趁好消息盡出，趁靚價食胡也是無可厚非。

短期睇唔到有新的利好消息，恒指又未能把握機會挑戰反彈阻力23,508點，昨日期指最高見23,419點，升越23,300點的食胡目標，不過筆者亦失了先機，差不多見期指午後無法重返23,200點樓上，才決定止賺離場。

昨日的穿頭破腳，短期大市整固可能性極高，回吐的「最低消費」，估計先試10日線22,890點，及上周支持22,727點，等買好倉博年底前上24,000點，短線點都要忍忍手，等調整支持出現先算。