Fundman睇市：長汽有勢挾多浸

其實歐央行都幾黑仔，推QE之後，歐洲經濟的壞消息幾乎未停過，先被希臘威脅脫歐搞一輪，跟手中國股災、人民幣閃跌，全世界都怕中國藉此將通縮出口。到A股穩定落嚟，又整個敍利亞難民危機，跟手嚟多劑歐盟經濟火車頭德國，爆出汽車業翹楚福士的廢氣測試事件，單單都杰撻撻，最終量寬僅令經濟無咁衰，卻未至於推動復甦，甚至未有耐見到通脹返到目標水平。

美國加息難度增

日本安倍經濟學威過一輪，自一四年五月通脹見3.7%之後，消費稅及刺激措施的遞減效應下，八月已經縮到得0.2%，與通縮不過一步之遙，日本國內已提出量寛加碼的訴求，歐央行又係咁，中國今年保七仲係五五波。

見外圍放水放得咁開心，上周五傍晚，人行趁墟突然減息降準，兩招齊發，對全球股市風險胃納回升，起火上加油作用，依家唔少賓架都估，咁形勢下，美國年底前愈來愈難加息，因為咁做唔單止對經濟復甦構成壓力，而且在全球央行放任寬鬆的取態下，等同幫各國的通脹及經濟衰退「埋單」。

歐央行暗示進一步擴大購債計劃之後，歐美股市風險胃納回升，上周五，一個月期以上港元同業拆息異動，之前驚美國加息流出的資金，有重新睇好利率敏感股、公用股及收息股之勢。股價在65元水平悶了相當時間的中電（00002），近排亦靜靜起革命，上周五見海嘯後新高。史提芬心水的地產股，新地（00016）、信和置業（00083）及長實地產（01113），固然可以睇多兩眼，REITs之中，專攻屋苑商場的置富產業信託（00778），應不受近日遊客區減租潮影響，一六年預計有5.8厘股息，仍是理想收息對象。

今時今日最無人吼，都要算到中港兩地的零售股，物美商業（01025）大股東突然以九成溢價，每股6.22元的價錢提出私有化，相對消息公布前的3.27元，睇落認真大手筆。大股東到底出於睇好業績復甦，抑或趁香港價殘收返去部署A股再上過？主觀認為後者機會高啲啲。四年前，中國零售概念仲係當炒之時，物美股價見過23元樓上，如今得番個零頭，唔少股東真係喊得一句句。此股唔少H股重貨股東都係大基金，且帳面成本唔平，買貨密集區都係雙位數字樓上，即使今次大股東出到每股6.22元，但基金股東係咪就肯投降輸少啲，真係好難講。

人行出乎預期的放水，對近日炒歐、日央行量寬加碼的股市，絕對是錦上添花。上周五，道指升0.9%，英股升1%，德股升2.8%，恒指夜期比現貨高水超過三百點，港股今年底前，升返去接近港股大時代的蟹貨區24,000至24,500點，機會唔細。

車市氣氛大逆轉

九月底中央出手救車市，將1.6升排量以下乘用車購置稅減半，消息一出，分析員對車股睇法近乎一百八十度轉變，汽車股成為十月初大市反彈初期表現最標青的股份。

兩隻低排車款銷售比例高的車股，長城汽車（02333）及吉利汽車（00175），前者在上周五收市後，剛公首三季度業績，多賺11%至62億元人民幣，扣除非經常性損益後，淨利潤59.5億元，增加8.1%，單以第三季計，因為支出高於預期，淨利潤14.9億元，按年則減少8.5%。上周五長汽股價於午後愈戰愈勇，由9.5元水平直飆至10.06元高位，最後收9.95元，升4.1%，未知這份業績，偷步客滿唔滿意？

由於年中銷情放緩，加上久聞樓梯響的純電動汽車，估計年底前有更多細節公布，唔少大行對前期開支有戒心，結果四月逼近20元後（經送紅股調整），長汽最低落到6元水平，高位計三分一都無。由於主打H9絕大部分型號排量都在低排稅務優惠之內，消息一出，長汽挾空倉的升勢認真誇張，六日升逾五成。

街外估長汽今年全年賺90億至95億元，雖然頭三季只係交出三分二目標，但第四季才是中央托市下的業績爆發點，預測相信不中亦不遠，一五年PE不足8倍，在9.5至10元入到，中短線有一定值博率，如果新能源車燒錢比估計的少，話唔埋挾多浸都唔出奇。