即使畀金融市場估中，歐洲央行有需要重新評估QE寬鬆規模，上周五之前的港股，陰陰乾的格局，又實在考驗好友們的耐性。上周五恒指裂口開高375點後，已是全日高位，惟即市調整壓力唔大，全日波幅僅132點。半杯水故事，可看成即市追價買盤十分審慎，但亦可見大市高位沽壓唔大，始終等買的要比等沽的人多。

上周五收市後，人行意外地出招，夜期比日市升多280點收報23,460點，突破23,350點首個食胡目標，今日以此作止賺，恒指短線目標上移至23,738點。

恒指在上周四觸及10日線後回升，短期上升趨勢未改，惟周五現貨成交唔夠，是周末假期前夕關係，抑或基金在23,000點樓上追貨意欲唔夠，相信很快會有答案。回顧八月跌市，恒指由24,924點跌至20,865點，只是短短十一日，由24,000點遇阻到跌穿23,000點，只是兩日時間，估計區域內蟹貨較少，有利短期進一步攀至24,000點中期目標。