呢兩年樓價不斷飆升，新盤管理費亦跟住樓價節節上升，其中有提供蚊型單位嘅上車新盤管理費，貴過大型屋苑，每月要過千。劉Sir睇番舊年同今年推出嘅9個主要提供蚊型單位嘅新盤，最細面積嘅單位全部唔大過300方呎，其中有3個新盤每個月嘅管理費全部過千元，每方呎管理費約莫3.6元至5元不等，比同區大型屋苑貴38%至2.18倍。

早前推售的慈雲山單幢新盤鑽嶺，每方呎管理費高達5元，估計是最貴管理費的九龍區單幢住宅之一。

富誠地產陳錫金指，單幢樓管理費每方呎普遍要4元以上。（資料圖片）

近年迷你單位新盤管理費

劉Sir綜合市場資料，發現舊年加埋今年推出嘅9個主要提供蚊型新盤，最細面積嘅單位由184方呎至295方呎，其中今年推出嘅6個新盤中，每方呎管理費約莫由3.48元至5元，而舊年推出嘅3個新盤，每方呎管理費都要約莫3.6元至3.95元。

近期推售嘅慈雲山單幢新盤鑽嶺，以實用面積計，每方呎管理費高達5元，估計係最貴管理費嘅九龍區單幢住宅之一，以呢個盤最細面積198方呎開放式單位計，每月管理費接近1,000元。

富誠地產陳錫金同劉Sir講，黃大仙新光中心以實用面積計，每方呎管理費約1.57元，面積382方呎單位每月要交約莫600元管理費，同區樓齡較新嘅樓盤現崇山每方呎管理費約莫3.3元。

相比同區 曉盈貴52%

鑽嶺嘅管理費比呢兩個屋苑，分別貴咗約2.18倍及約52%。佢仲話，單幢樓嘅管理費通常貴啲，每方呎管理費普遍要4元以上，因為最低工資實施後，人工升咗，加埋新樓啱啱開始營運，未有盈餘。

舊年推售嘅長沙灣曉盈每方呎管理費約莫3.8元，最細面積295方呎單位每個月要交1,121元管理費。中原歐陽振邦話，以實用面積計，目前西九四小龍昇悅居一個面積最細一房單位，實用面積約378方呎，每月管理費約945元，每方呎約2.5元，劉Sir計一計，曉盈貴咗約52%。

酒店式服務推高收費

另同年推售嘅港島西區尚嶺每方呎管理費約3.6元，最細面積292方呎單位，業主每個月要交約1,051元管理費。代理話，區內大型屋苑寳翠園每方呎管理費約2.6元，即係前者貴約38%。

產業測量師張翹楚同劉Sir講，新型屋苑喺近十至十五年，會所設施大幅增加，管理服務亦趨向酒店式管理，令到管理費飆升。