第三季結之後，似乎損手爛腳的本地基金，知恥近乎勇一輪衝鋒過後，近兩日從大市成交所見，又靜返落嚟，始終美國加息預期降溫落鑊炒一浸後，美國企業第三季業績麻麻地，無乜新炒作概念，似乎要等十一月IMF開會，睇會唔會將人民幣納入特別提款權（SDR），從而令暴力救市後，對中國概念投資興趣跌到新低點的基金經理，重新恢復信心。

和電現價息率5厘左右，收息一族可以考慮。（資料圖片）

太陽日誌

前晚美股單日轉向，埋單倒跌收場，返到萬七點樓上的道指，看來需要時間整固。昨日港股低開兩百點後，有買賣兩閒之感，恒指最後跌160點，收22,439點。賭美國加唔到息，息口敏感的地產股及靠收息的領展（00823）表現比較好，恒隆（00101）、新世界（00017）及信置（00083）逆市升1.5至1.7%，屬表現最佳藍籌。

炒政策要識落車

個市牛皮悶局，無故仔落鑊，資金賭月底召開的五中全會，以及即將公布的「十三五」規劃，新能源、光伏及環保行業都見有追捧。以過去經驗，相信會議結束前都仲會有一浸升吓，但前車可鑑，強如去年提出的「一帶一路」及「互聯網+」，都係喊完一輪口號之後，唔使幾耐玩完，中國的喊口號式改革，轉身快的散戶及炒家，仲可以恃着身手敏捷快炒一轉，但對於有特定時間持貨限制的基金，有幾多芬佬有興趣逐浪，小弟都有啲懷疑，無乜基本因素支持純炒作的，記住要識得落車。

尋日內銀股全線向下，周末人行將信貸資產抵押再貸款試點，由山東及廣東擴展至全國九個省市，被形容為中國版七萬億人仔QE，但股市反應卻是雷聲大雨點小，君可見工行（01398）、建行（00939）兩隻內銀股龍頭，周一都見唔到上周五的今浪反彈高位，又再掉頭腳軟。

毫無疑問，措施令銀行可以將國債等較高級別的資產拿去央行抵押，再套現拆借出街，變相有機會做多啲生意。但內地經濟失速，銀行近季壞帳一直攀升，即使抵押品上選擇多咗，但驚貸款變爛帳下，有幾多銀行願意冒險擴大三農及小微企業貸款，頓成疑問。

雖則依家內銀股估值係平，平均連一倍市帳率都未有，但芬佬實在搵唔到理由去博，一來不良貸款一兩季內都應該未見頂，其次亦怕人行再嚟不對稱減息，搞到銀行息差壓力加大，短期內銀炒下波幅無妨，想賭升幅就難少少。

蘋果公司近排都算黑仔，啱啱iPhone6s爆出「晶片門」事件，同一款電話用三星及台積電兩間晶片公司產品，耗電量被指有顯著分別，結果捧場客群起攻之，蘋果公司最後都要出嚟解畫，情況如同iPhone4的天線門出事一樣咁肉酸。

尋日又畀美國法院判定，幾款電話及手帳產品未獲允許下，使用屬於威斯康辛大學麥迪遜分校授權部門的技術，面臨最高8.62億美元的賠償，以蘋果公司律師團隊的身經百戰，相信最後大事化小，賠償了事機會仲係大，但彰顯美國國力的科技龍頭都搞到倒瀉籮蟹，睇怕落到110美元邊的股價，短期仲未跌夠。

概念股全線死火

話說回頭，近排見iPhone6s先達回收價通通「破發」，一來中國反貪，送禮文化不再，其次中國列入首批推出地區，水貨北上誘因大減。小弟認為，新一代純屬周期性的小改版本，除咗玫瑰金色外，換機純粹想「潮」畀人睇的炫耀式換機客需求肯定會少咗。眼見日本等主要市場首發反應麻麻，唔少大行都調低咗今季的銷售預測。睇返轉頭，其實將中國放入首發地區，蘋果公司可能都係有自知之明先會咁做。

影響所及，蘋果概念股之一的瑞聲（02018）早排50元頂到實，已輾轉見級級落，富智康（02038）六月見過5元之後，近期亦似跟唔上資訊科技股反彈勢頭，昨收3.69元，較港股大時代之後低位3.31元，只高出一成一左右。

早前估計，高息的兩隻電訊股和電香港（00215）及數碼通（00315），在美國加息幅度極為有限，蘋果公司又出新機下，應該有睇頭，結果只估中一半。和電半年成績表勁到爆，因為上一代大屏幕iPhone6大賣，令手機硬件收入大升所致，但以今代iPhone6s氣勢明顯唔及上一代，業績有重估可能，近期股價在3元邊徘徊，但以預計息率5厘左右，假如再插低啲，收息一族可以諗吓。