內地九月份CPI同比增長1.6%，在豬價升勢明顯放緩之下，低通脹環境提供更大空間讓中央加大量寬以穩增長。之不過，昨日中港兩地股市均低收作結，成交淡靜，板塊表現個別，總之話好又唔係，話好差又唔係，唔知點形容，真係悶局一場！

A股精要

呢啲市只有炒股唔炒市，昨日新能源股成焦點，升幅比較顯著的有金風科技（02208）、京能清潔能源（00579）、興業太陽能（00750）、順風清潔能源（01165）、協鑫新能源（00451）等。不過，整體而言成交唔算太突出，只係市場缺乏焦點，呢類股股價又普遍低殘，炒一轉亦唔係咩難事，但睇怕月底五中全會前就會散水，跟炒記得轉身要夠快！

跟炒宜搵隻人氣高啲的，方便逃生。就睇吓順風潔能，昨日成交1.1億元，收報2.63元，升8%。事實上，呢隻股股價仍相對低迷，10日線剛重上50日線，成交配合，具值博率。

現價具值博率

順風主要從事太陽能業務，今年上半年旗下太陽能發電站的總發電量達51.2萬兆瓦時，截至六月底止的太陽能發電站之預計年設計裝機容量2,267兆瓦，實現年總設計裝機容量產能1,622兆瓦的併網發電，另兼營製銷太陽能產品。

值得留意，去年八月公司收購了一家德國太陽能企業，拓展海外市場，另投資了一家從事儲能電池管理技術的公司─PowinEnergy 30%股權，該項目擁有先進的鋰離子電池儲能技術，亦提供快速高效低成本的快充裝置技術，可廣泛運用於停車場、電動車充電。可見，順風除咗可以炒內地光伏產業政策支持外，亦具備新能源汽車概念。

反正股價尚處低谷，若今轉憑雙概念炒上衝穿3元關，再向上較大阻力在3.3至3.5元區域，失守2.3元止蝕。