Fundman睇市：萬洲有抄底機會

上周的美林資金流報告，確認新興市場撤資的恐慌，可能到達短期高峰，十月八日之前的一個星期，環球分別從股票及債券基金抽走43億及24億美元，湧入貨幣基金中避險，經驗話轉角市萌芽於全人類想法一致的一刻，九月底開始金融市場人人要錢唔要貨，可預期在冚倉壓力下，新興市場及商品短期有望喘定。

早排人人唱淡話港股要跌穿兩萬，魚缸即刻同大家開個玩笑，過去八個交易日，恒指由20,368點，到上周五收市22,458點，累積升超過二千點，升幅達10.3%。

油服股提防虛火

若非善忘，四月港股大時代起步位約在25,000點附近，亦正是金融海嘯以來，多年試攻未能成事的重要阻力區，早前講過，四、五月持續每日千多兩千億元成交額追入的蟹民相當多，一旦跌穿25,000點，短期要升返上去絕非易事。不同的是，八月的大插插，大市破24,000點後成交萎縮，跌得誇張，但主要理由係無乜基金有興趣出嚟接貨，期間蟹貨實際有限，補倉潮應有機會把大市推到至少24,000點附近。

美元弱、商品彈，上周五，三桶油再發力，連帶油服股都炒埋一碟。其實，近日金銀銅鐵錫，以至頁岩氣及石油勘探礦主，無不因為商品價瀉而呱呱嘈要減產，幾時先會再有興趣開新井增產？今時今日講上游行業復甦，恐怕十畫未有半撇，小心油服股不過係一道虛火。

話時話，商品巨擘嘉能可（00805），兩星期前仲畀人唱到商品界出現雷曼翻版事件咁滯，此一時彼一時，基金在美元、商品冚倉，嘉能可即刻急速反彈，短短幾日，其股價由8.4元彈返去15.3元，升幅八成二。

查實，叫得商品界翹楚，多多少少都有自救方法，上月關掉兩個非洲銅礦，停產十八個月托價，上星期再一口氣將澳洲、南美及哈薩克的鋅礦拉閘，相當於嘉能可整體鋅年產能力三分之一。有見近日收緊供應的效果唔錯，相信其他上游巨企都好可能陸續照辦煮碗，減產托市。話說回頭，今浪商品價格回升，係轉勢抑或純粹死貓彈，仲要睇全球最大消費者中國的經濟，短期內有冇起色至知。

網龍好戲在後頭

港股夜期高收，上周五美股續升，今日早市開高機會唔細，經過連續幾日雞犬皆升的反彈市後，仲有乜值博，倒是有點費煞思量，自O2O兩大翹楚大眾點評及美團合併後，O2O市場競爭預期將會加劇，百度話假如美國投資者唔識貨，至多退市返A股玩過。一句講晒，發晦氣兼且呻價值未能在股價身上反映。上周五晚，美國上市一眾內地互聯網股普遍高收，上周推介的網龍（00777）即使假期前反高潮，但唔使太早氣餒。

諗起隻大落後股，全球最大的「豬肉佬」萬洲國際（00288），由上市到依家，真係無乜大孖沙鍾意佢，上市前去美國鯨吞另一豬肉佬Smithfield（SMF），與本身雙匯的資產合併後，以一加一等於三的定價上市，早已遭人詬病，為搞掂收購引發的貸款，要焗住減價招股，股市就係咁衰，多人搶貴一貴都得，一個話反應唔好減價，再平都依然雞飛狗走。

去年八月，萬洲以每股6.2元上市，之後級級落，去年年底見過3.75元，十月大市反彈前再試一次3.79元後拗腰，似乎中長線的重要支持已經確認，現價4.3元，比招股價潛水三成一，主要係上半年業績實在差勁，純利跌四成二至3.03億美元。

受供應減少帶動，內地豬肉價格回升。第三季最遲第四季，萬洲內地營收應會見底，至於SMF，一五年倒退後，一六年貢獻預料也會回升，加上合併後節省營運成本效果漸漸浮現，明年業績恢復增長的可能性極大。

當年12.9倍PE收購SMF，再攞番嚟賣15至20.8倍，在下話過唔低（最後減到12倍樓下），硬上完後業績走樣股價食瀉藥，計落現價一六年PE唔夠9倍，比當日買SMF估值更低，應該可以重新關注。