呢幾年已經慢慢轉型為商業區嘅沙田石門，嚟緊呢個禮拜五將會有新供應，今次截標嘅地皮係石門安耀街商貿地，劉Sir知道，呢區近幾年都批出好幾幅商業地皮，好似億京喺一一年底先後投得兩幅石門商貿地，所以相信億京都相當有機會入標，測量師老友就估計呢幅地皮估值接近7億元。

沙田石門安耀街商貿地將提供逾十七萬方呎樓面。

張翹楚認為，九龍東活化工廈項目，較石門地更具吸引力。（資料圖片）

沙田石門安耀街商貿地資料

今次截標嘅石門安耀街商貿地，規模比起之前批出嘅同區地皮唔算好大，佔地大約1.8萬方呎，可建總樓面約莫17.4萬方呎，而地皮位於馬鐵石門站附近。

中小發展商勢踴躍

劉Sir老友理想城市張聖典就咁睇，佢覺得呢個項目規模唔算好大，相信都可以吸引到中小企，或者用家出手競投，出價分分鐘高過其他發展商，佢估計地皮每方呎樓面地價約莫3,500元，計番估值即係約6.08億元。

不過，老友產業測量師張翹楚就唔係睇得咁好，佢認為未來九龍東有唔少商廈供應，而喺該區將工廈活化做寫字樓，講緊每方呎成本都係約莫8,000元，相對之下，比石門有吸引力得多。

所以，張翹楚對呢幅地皮成交價都唔睇得太高，預計每方呎樓面地價約2,550元，計番估值大約4.43億元，係市場嘅下限價。

而綜合市場估值就以中原估得最進取，該行估計地皮每方呎樓面地價約莫4,000元，即係估值大約6.95億元，係市場最高估值。

億京奪兩地料再爭

劉Sir知道，石門已經有好幾年未有商貿地推出，對上有地批出要追溯去到一一年底，當時億京就先後用咗超過8.2億同埋6.8億元連環投得兩幅商貿地，即係安群街1號同埋安群街3號兩個項目，當時每方呎成交樓面地價平均約1,900多元。

而呢兩個項目近排已經開始拆售，劉Sir預期億京會有機會出手，競投嚟緊禮拜五截標嘅石門商貿地。

至於同區對上一幅批出嘅商貿地皮，就由滙豐銀行投得，該銀行喺二○一○年底奪得沙田石門安耀街、安群街與安麗街交界嘅商貿地，成交價超過8.1億元，平均每方呎樓面地價約1,777元。