二手樓市冰封，代理行都大呻搞唔掂，有代理老友同劉Sir講，因為二手成交量低迷，今季開舖策略會變得保守審慎，仲話天價分行續租時，若然業主要大幅加租或不獲減租嘅話，就會唔續租。其實好多業主同發展商都會對代理行收貴租，聽講新界某屋苑嘅代理行分店，呎租竟然高達500元，可以話係拍住旺角彌敦道部分街舖水平。

近期二手交投陷悶局，不少代理行都生意大減。（資料圖片）

美聯集團黃子華稱，集團今季開分行時會較審慎。（資料圖片）

樓宇買賣合約走勢

美聯集團（01200）董事總經理黃子華話，近排二手市冰封，集團今季採取保守策略，開行審慎，而人手方面就視乎後市情況，包括加息同內地經濟等因素，若個別天價分行舖位續租時，被業主大幅加租或不獲減租，就會考慮唔續租。

新界呎租500 代理呻貴

而佢哋集團尋日成立全新嘅「住宅部－九龍總部」，佔地約3,000方呎，主力用嚟做九龍區精英重點培訓基地，同埋一、二手銷售策略中心，為前線主管同營業員提高培訓。

而中原地產亞太區住宅部總裁陳永傑同劉Sir講，其實旗下貴租分行都一樣考慮緊唔續租，因為好多大型屋苑都由發展商控制住代理行嘅數目，好似旗下新界某屋苑嘅分店，面積約莫1,000方呎，但月租就高達50萬至60萬元，呎租至少500元，真係拍得住旺角彌敦道部分舖位，不過只要屋苑成交量足夠，代理行數目唔多，分店都仲做到生意，所以有機會都會續租。而近月豪宅區分行無生意，可能會減少呢類分店數目。

利嘉閣地產裁總裁廖偉強就話，唔會去爭貴舖，依家部分貴租舖位可能搬到去同區比較平嘅地方，但暫時就未有計劃減少分店數目，而近排已經同個別業主傾緊減租，至少都減5至10%。

銀行低50%租怡和街舖

另有消息話，銅鑼灣怡和街一個雙號地舖連一樓，面積約5,900方呎，以每月約80萬元租咗畀銀行，比舊租低近五成，呢個舖曾經喺舊年九月以約250萬元放租，舊年底減到去150萬元。

而同區波斯富街雙號地下，面積約800方呎，亦以約18萬元租出，比舊租都低咗約45%。另外，同街毗鄰雙號地舖以約15萬元租咗畀短租客，比年初長租叫租低咗約八成。

舖市表現轉差，但寫字樓仲係保持到。美聯商業蕭惠碧稱，灣仔鷹君中心高層01至03室，面積約9,381方呎，以月租63.8萬元租出予中資金融公司，呎租68元，創該廈呎租次高。