Fundman睇市：新奧能源反彈力強

美國九月份就業數據之差勁，有迹象正改變市場對聯儲局短期內加息的想法，就算主席耶倫依然聲嘶力竭，預告年內加息機會仍高，但利率期貨卻有另一番演繹，十二月加息的機會率，由數據公布前四成三降至執筆時三成七。

之前有大行做過統計，自九四年開始，或者係免得對金融市場構成不必要震盪，聯儲局未試過有一次貨幣政策變動係低於七成市場共識下進行，依家估年底加息的，得返稍高於三分一機會率，聯儲局實在無必要夾硬嚟，尤其現時通脹還不到目標的2%，實在有大條道理繼續拖得就拖。

港股可見二萬四

美元回軟，油價及商品貨幣回升，整個金融市場似乎正在掉轉頭玩，恒指昨日升破七、八月期間屢試無功的22,000點四頂阻力，勁升684點，收22,515點，成交額對晒辦，跌市以來罕有地破千億元。

睇番九月期指結算日，恒指跌到20,386點，創下大時代新低，期指淡友大獲全勝之後，已經見連續三日裂口向上，看來第三季結之後，手持現金比例處近幾年高位的基金，都有知恥近乎勇的覺悟，望第四季可以追回一些失地。

事實上，今日A股兩融高位滑落，股指期貨在阿爺限制多多下，早就半死不活，做淡質現貨誘因都無埋，滬綜指落到三千點，沽壓有限，壞消息出盡，反之短期美國加唔到息、IMF九成機會短期內將人民幣放入SDR、三間電訊商的鐵塔公司上市，加上汽車、房地產及澳門賭業的針對性振興措施陸續出台，短期個市未必太淡。高位蟹貨多籮籮，去番大時代高位28,588點就無乜可能，但以低位20,368點計，彈返跌幅五成見24,478點，即大時代起步位25,200點樓下，機會是未可抹殺。

話說回頭，今日A股假後重開，連日來美股、港股勁升，內地官媒又落足嘴頭，做埋統計話十一假期後，首日及當月滬綜指六成機會向上，驚死你唔信一樣，照計滬綜指見3,150甚至3,200點唔係唔得，但只怕開得咁高，即市回返多少，港股都會有班趁勢食胡之士，所以今日衝入去前，都係睇定先好。

石油股值博率降

講番個市，其實嘉能可（00805）早幾日的報復式反彈，短短幾日由低位回升六成八，在在反映商品相關投資，在嚴重超賣下，展開了猛烈的修正。固然三桶油都好巴閉，中海油（00883）咁大隻藍籌可以一日抽13.7%，搞到二三線股一樣，三桶油加埋貢獻指數120點。

上周末，油組老大哥沙地先因為國庫空虛、庫存積壓要減價促銷，油價彈番到50美元樓上唔難，但三桶油業績點都要幾年時間先有機會回到一四年水平，死貓彈之後，感覺上值博率又唔係好高。

四月以來，燃氣股跌幅唔細，尋日瑞信調高新奧能源（02688）目標價一蚊咁大把，由53元改為54元，但重點是該行認為內地天然氣消費增長，有機會不及市場預期樂觀，不過四月至今股價跌幅亦大致反映，展望阿爺要催谷潔淨能源應用，短期有機會調低非居民用氣價達兩成，結果一眾燃氣股通通炒晒上去。

其實對比石油股，燃氣股即使今年業績升得少及些微倒退，都已經在近半年的調整中反映咗，像新奧一六年預期市盈率得12.3倍，貼實10至33倍的十年歷史估值下限，假如真有減氣價消息，彈力斷估會比較強。

勢估唔到，汽車股炒極都仲未夠喉，長汽（02333）昨日再升14.7%，同幾日前低位6.5元相比，累積升六成三，阿爺減1600cc樓下車種購置稅，長汽有八、九成車款受惠，基金狂補倉可以理解，有啲古怪是今浪升得唔多的華晨（01114），尋日亦捱終於番上「花蟹」價，升9.4%報10.24元。

華晨寶馬主打的3系、5系及X1，由車網見得兩款入門版316有1600cc級別，其他都未能受惠九月底出台措施，中期業績急跌四成四後，高管調低過全年華晨寶馬銷售增長預測到頗悲觀的4%，會唔會因應近排車市好番，掉頭調高抑或有其他消息跟尾，見尋日個勢，可以留意吓。