今日內地股市復市，昨日港股率先慶祝，恒指高開53點後扶搖直上，午後動力進一步增強，最終升穿二萬二，報22,515點，升684點或3.1%；國指跑贏大市升4.6%，報10,394點，除重上一萬點外，更上破八月尾至今營造的高低桿雙底頸線阻力，走勢轉佳，主板成交突破千億有1,086億元，不排除有資金睇好內地復市走勢，故率先在港股落注以免走寶。

板塊方面，券商股昨日強勢回歸，海通證券（06837）、申萬宏源（00218）及國泰君安（01788）升9至11%不等。不過假期前滬深兩市成交仲係淡過淡水，除非短期有利好政策出台，又或者股市氣氛突然大幅改善，否則長假後成交能持續暢旺機會不大，一句到尾：券商股短炒無妨，長揸無謂！

至於近期強勢板塊，相信非汽車股莫屬。無他，板塊早前跑輸大市，估值相宜外，最重要係中央突然出手扶持新能源及小排量汽車，令本來行業景氣不佳、資金逐漸心灰意冷的汽車股死過翻生！

夥騰訊發展電動車

昨日二十大升幅榜就有隻市旺時炒過一輪，但之後難敵大市調整的和諧汽車（03836），昨日急抽17%至4.61元收市，成交仲增至5,645萬元，現價先後上破10日、20日及50日平均線，MACD牛叉持續拓闊，既然走勢正路，值得望多兩眼。

從基本面分析，和諧汽車要炒上其實唔難。首先，集團今年三月與騰訊（00700）及鴻海簽訂「互聯網+智能電動車」戰略合作協議，合作發展電動車，單睇牌面都有得諗。

其次，在汽車業不景氣下，集團業績表現尚算有交代，今年上半年新車銷售較去年同期增長7.4%，增速高於市場均值；收入上升0.1%至50.08億元人民幣；盈利則上升1.6%至2.79億元人民幣。有業績撐住，難怪近期股價跌到落3元邊已跌唔落。

此外，集團控股股東於七月份三度增持公司股份，均價分別為6.179元、5.036元及6.855元，合計均價則約6.05元，若以昨日收市價4.61元計，增持後股價已累跌23%，既然有大股東「照住」，加上往績市盈率亦得7倍幾，買落點會唔放心。