活化工廈政策尚餘半年便玩完，多個工廈項目都趕尾班車入紙申請活化。有代理同劉Sir講，過去半年全港已新增8宗工廈活化申請個案，其中包括咗第一集團旗下嘅九龍灣宏泰道第一集團中心全幢工廈申請改裝做商廈，同時亦以14億元放售。另外，該集團透露，早排買入嘅淺水灣道74號獨立屋，相信可以喺一七年推出市場，聽講市場參考價仲高達20億元，有望創下全港住宅售價新高。

霍偉良（中）表示，第一集團中心全幢工廈活化後，料年租金收入逾6000萬元，升幅約一倍。

第一集團旗下項目最新情況

活化工廈政策將於明年三月底完結，美聯工商董事陳偉志話，最近半年已新增8宗工廈活申請個案，預計餘下半年時間會有更多工廈趕搭尾班車。

而今年首九個月工廈成交宗數錄得3,036宗，成交金額錄約245億元，分別按年升54%及59%，全幢工廈成交宗數錄8宗，按年跌20%；佢估計全年工廈租售價可錄最高15%升幅。

第一集團董事霍偉良話，旗下宏泰道第一集團中心全幢工廈已入紙申請活化做商廈並同時放售，若未遇到理想出價，工廈活化後就會作收租用途，屆時全幢年租金收入料逾6,000萬元，平均呎租約22至25元，較活化前高約一倍。

第一集團商住齊出擊

另外，該集團在早前政府賣地購入的長沙灣道650號商業項目，明年中會以樓花形式拆售，涉及108個單位，定價會參考同區寫字樓。

此外，霍偉良話，淺水灣道74號獨立屋，實用面積約2萬方呎，料於一七年推出，有望挑戰全港住宅售價新高。

至於九龍塘達之路9號豪宅，料於十月底完成裝修，今年內會以招標形式推出。聽講兩項物業市場參考價約莫20億及約10億元。

新光21億放售三物業

另新光酒樓集團放售三項共值21億元物業，第一太平戴維斯方詠清話，包括曾標售嘅黃大仙新光中心及葵興新葵興廣場，是次意向價分別為10億及8億元，分別較一年前低4億及2億元，另上環新街市街8號地舖，意向價3億元，現由鳳城酒家以72萬元承租至十一月。

該行袁志光又話，西環皇后大道西421號華明中心商用單位及兩層停車場標售，意向價15億元。另中原話，銅鑼灣禮頓道商廈合誠大廈全幢放售，總樓面面積約4.7萬方呎，以約14.5億元放售。