舖租瘋狂倍升已成過去，劉Sir尋日聽戴德梁行啲老友講，今年截至第三季，四大核心區舖租按年跌咗23至34%，銅鑼灣羅素街同啟超道最慘情，呢兩條街第三季平均實用呎租得番約2,257元，已經跌穿一○年水平，預計各核心區舖租今季會繼續跌多5%。

本港零售市道轉差，銅鑼灣羅素街舖租首當其衝。（資料圖片）

林應威（左一）預期，第四季各核心區舖租會再跌半成。

四大核心區平均實用呎租走勢

戴德梁行香港商業部主管林應威話，雖然十．一內地長假期嚟香港旅客人數有所回升，但由於港元匯價較強，所以環球經濟依然唔明朗。

食店好景 租金升近8%

今年截到第三季四大核心區一線街舖續租嘅租金，按年跌咗23至34%，其中銅鑼灣羅素街及啟超道平均實用呎租跌到約2,257元，仲低過一○年嘅2,422元，至於中環、尖沙咀及旺角嘅主要街道呎租亦都去番一一年水平，預期第四季各核心區舖租仲會再跌多5%。

佢仲話，依家有更多化妝品同時裝商戶可以進駐部分一線商舖，估計明年舖租走勢會較穩定；至於飲食業情況就較樂觀，截到第三季，銅鑼灣同尖沙咀食肆舖租反而按年仲可以升約7.9%。

至於寫字樓租金今年相對有支持，該行香港董事總經理蕭亮輝話，第三季全港商廈吸納量約47萬方呎，待租率比第二季跌咗0.7個百分點，去到4.6%，對租金有支持；而中區超甲級商廈及中區整體商廈租金按季升咗逾3%，呎租分別約115元及106元，係全港之冠，估計第四季全港商廈租金仲可以再微升1至2%。

該行香港區高級董事總經理陶汝鴻話，佢哋公司已經同高緯環球合併，成為全球規模第二大嘅房地產服務商，分布喺60個國家，僱員數目有4.3萬名，年收入高達50億美元。

另外，據土地及公司註冊資料，羅素街8號英皇鐘錶珠寶中心6樓全層以1.02億元售出，比今年六月成交價低800萬元，買家為采得有限公司，其董事包括林韋鋒。林氏同東方紅藥業集團董事總經理同名。

藥房低兩成租旺角舖

消息指旺角山東街單號地舖連閣樓，面積約1,000方呎，由藥房以約22萬元租咗，比舊租金低兩成。美聯旺舖朱志龍話，元朗西裕街17號民康大廈一籃子地舖連一至三樓及平台，以3.2億元連約放售。

工廈方面，第一太平戴維斯蕭兆新話，觀塘偉業街134號工業大廈標售，總樓面面積逾4.5萬方呎，意向價約2.5億元。

利嘉閣工商部鄧遠智話，葵涌樓花工廈星星中心開售兩星期，累售約九成單位，呎價最高達1萬元水平。