北水動向：睇好內房首選中海

中航科工搭順風車

一如所料，上大人出手救內房，與房地產相關的行業都能受惠，如建材、家電等等。上周五家電股便一洗頹風，國美電器（00493）股價急彈12%，創維（00751）及TCL多媒體（01070）均升一成，真係好耐冇見呢個板塊有咁熱鬧，若然氣氛繼續轉旺，建議睇實隻創維。

此外，軟件及科網股亦見異動，中訊軟件（00299）股價急升18%，網龍（00777）升5%、擎天軟件（01297）升7.75%。不過，交投普遍一般，略嫌鑊氣唔夠，可以睇多一兩日再下定斷。上周五提及的中航科工（02357）果然有料到，注資消息刺激股價急升12%。既然股價成功突破阻力位，守穩6.2元可繼續坐順風車。

講番內房股，筆者認為都係唔大唔揀最穩陣。畢竟如今內地經濟仍存不明朗因素，一旦外圍又有咩冬瓜豆腐，高債民企內房最危，實際上是國家控股的大型房企，即使衰到無譜肯同佢捱唔會得番零，若然行業景氣真係改善，大型房企物業組合全國覆蓋率高，能受惠利好政策的程度自然較大。

如果想追內房股，建議留意中海，上周五收報25元，走勢上股價以大成交重上250日線，10日線亦剛重上50日線，短線現利好訊號，追入目標上試27至28元區域，失守23.5元止蝕。