市區重建局嘅深水埗海壇街「蚊型」需求主導項目，將會喺今個禮拜三截收發展意向，呢個項目只提供69個住宅單位，部分單位將來更要用作「樓換樓」安排，但由於涉及嘅投資金額始終比較細，劉Sir覺得項目嘅競投反應唔會太差。而測量師老友都估計每方呎樓面地價約莫4,500元起，估值就大約1.84億元。

深水埗海壇街項目料提供近七十個住宅單位。

理想城市張聖典稱，「樓換樓」條款會令發展商出價較保守。（資料圖片）

劉Sir知道，深水埗呢個海壇街205至211A號需求主導項目，係首輪需求主導先導計劃嘅其中一個重建項目，地盤面積只係得約莫4,553方呎，住宅樓面大約34,123方呎，提供約莫69個住宅單位，同時設約6,825方呎商業樓面。

「樓換樓」條款礙出價

該項目涉及嘅投資額唔大，而且位處市區，劉Sir相信禮拜三截收意向反應會唔錯，相信發展商都會遞交意向，申請「入場券」。

其實舊年年底推出嘅同區海壇街229A至G號需求主導項目，規模同今次截意向嘅項目差唔多，同樣提供約69個住宅單位，該項目截收意向時就收到27份意向書。

劉Sir老友理想城市張聖典就話，嚟緊截收意向嘅海壇街重建項目，位於內街，所以景觀唔算開揚，再加上有「樓換樓」等限制條款，相信發展商出價都會保守啲，估計每方呎樓面地價大約4,500元，估值約1.84億元。

產業測量師張翹楚就認為，「樓換樓」會減低項目設計上嘅靈活性，但相信唔會影響發展商嘅競投意欲，估計每方呎樓面地價約5,760元，計番估值大概2.36億元，係市場估值嘅上限價。

遠展長地競投機會大

其實市建局喺舊年年底，都推出咗兩個海壇街重建項目，其中規模細啲嘅海壇街229A至G號需求主導項目，就由遠東發展（00035）投得。至於長實地產（01113）奪得嘅另一個海壇街及桂林街重建項目，規模就大好多，而發展商早排已經向城規會提出規劃申請，打算興建4幢住宅，涉及877伙，相信呢兩家發展商都幾有機會競投嚟緊截收意向嘅海壇街項目。