儘管港股十月份首個交易日顯著上揚，然而市場普遍對後市走勢審慎，有散戶揚言「升多少少會走埋啲蟹貨」，個別則表示暫時只會短炒。

散戶樊小姐料港股下跌空間不大。

散戶陳先生指，有意吸納個別A股。

盧先生說：「呢幾個月港股都唔穩，十月都唔太睇好，因為加息因素令市況未明，所以會逐步降低持貨量，暫時唔會再入市，升多少少就會走埋啲蟹貨佢。」

驚息魔 避開地產股

梁先生說：「雖然十月首個交易日港股上揚，但依家整體大圍環境皆向下，所以我都係睇跌，暫時會集中短炒，包括『一帶一路』相關的概念股，長線則睇好比亞迪（01211）。」

而樊小姐則認為，港股連續下跌五個月，已經累積很大跌幅，再下跌空間不大，所以十月出現股災機會好微。她又說：「市場上嘅壞消息都已經盡出，相信嚟緊個市會平穩向上，只是受加息因素影響，會避開地產股，但會買入內銀股作中長線投資。」

港股及A股皆有涉獵的陳先生說：「十月被視為傳統股災月，相信會左右部分散戶決定，但A股過去幾個月已經調整唔少，加上十月召開十八屆五中全會，相信會帶嚟正面消息，預期A股會有合理反彈，一直跟住A股走嘅港股會有向上動力。嚟緊會伺機吸納個別A股，例如招商地產（000024.SZ）。」