過去的周末內地冇特別消息，期指上周五尾市抽升，昨日就要嘔凸，即月期指跌403點收場，報21,681點，低水76點。走勢上，恒指三次上攻22,000點樓上無功而還，睇怕捱埋呢個月底季結，十月可能又有大龍鳳。似乎上大人亦預視到有呢一着，基本上現時A股股指期貨已陷於半停頓，炒家想在A股布局興風作浪已不可能，班淡友會唔會改喺香港開「扒地」，不得而知。反正，如第四季兩市真係失守第三季低位，唔殺到極度超賣滿地屍骸，都咪諗入場博反彈！

本周全球焦點在中美兩國元首會面，其中一個關注點，乃共同應對氣候變化，由中美企業共同投資成立建築節能基金項目。據講美方參加企業包括華平投資集團，正是亞美能源（02686）的主要股東之一，會否帶挈亞美有份參與部分項目，不妨拭目以待。

此外，有關國企改革的消息不絕於耳，內地傳媒引述中糧集團管理層指，下一步大致按糧油、食品、地產、金融等類別，採取「合併同類項」的辦法，對旗下十一家上市企業進行拆分及整合。雖然未有提到具體方面，都足以刺激旗下上市公司股價逆市做好，其中中糧（00606）升6%、中國食品（00506）及中糧包裝（00906）同升3%。

每次呢系炒重組，都係中糧同中食最好炒。不過，睇尋日中糧都係得1億元成交，中食仲奀，成交唔夠5,000萬元，顯見鑊氣已大不如前，所以筆者都唔建議高追短炒，維持早前的睇法，即季內中糧跌浪落到去2.7元水平中長線有得諗，始終國改呢個概念唔會係一朝一夕就可以見到成效，買得嚟坐就要做好長期作戰的心理準備，短炒則可免則免。