近排睇得多風行全港嘅迷你新盤單位，尋日去睇信置（00083）西半山Cluny Park現樓嘅示範單位，即時大開眼界。呢個盤只係得27伙，示範單位面積有成2,400方呎，淨係個主人套房都差唔多450方呎咁大，足足相等於兩個迷你新盤單位，盡顯豪宅氣派。發展商話，上周五至周日已錄逾300組客睇樓，睇得嘅都非富則貴，唔少係城中富豪及上市公司主席等，最快今個月正式開售。

西半山Cluny Park示範單位的大廳面積超過620方呎。

主人套房面積約450方呎，相等於兩個迷你新盤單位。

信置田兆源（左）表示，Cluny Park有機會於本月開售。

劉Sir尋日跟信置營業部聯席董事田兆源去睇Cluny Park現樓，唔知係咪近排睇得多迷你新盤單位，尋日感受嘅豪宅感覺寧舍深刻。講返個示範單位，係位於12樓A室大宅，實用面積2,369方呎，設私家電梯大堂，間隔為四套房設計，無錯，4個房都係套房，絕對夠晒私隱度，完全豪宅格局，同時有多達6個浴室或洗手間。

咪以為間咗4個套房之後會影響室內空間感，聽田兆源講，示範單位嘅大廳面積足足超過620方呎，加埋大大塊落地玻璃窗，間屋夠光猛之餘，空間感唔錯，家庭成員多啲都足夠地方搞下聚會，仲有，配合窗外開揚維港海景呢個賣點，發展商特別為單位打造咗面積98方呎嘅特大露台，得閒行出去欣賞下海景都幾心曠神怡。

數日逾三百組客睇樓

至於4間套房之中，主人套房面積都有成450方呎咁大，相比起近排成日睇見嘅面積唔夠200方呎迷你單位，真係間房都等如兩個迷你單位咁大，而主人套房仲有獨立露台，浴室特設偌大窗戶，主人可以一邊浸浴一邊欣賞翠綠山景。

田兆源又話，Cluny Park示範單位自上周五起接受預約參觀，截至周日已錄超過300組客睇樓，涉及逾1,000人，包括唔少城中富豪及上市公司主席等，項目有機會月內開售，每方呎管理費約6.5元。

峻瀅新價單加幅達38%

另長實地產（01113）尋日推出將軍澳峻瀅3個取消交易單位嘅新價單，價單售價658.8萬至895.5萬元，呎價11,188至12,969元，買家可獲售價15%總折扣優惠，搵返資料，呢3個單位喺一二年成交價約406至568萬元，即係今次折實售價已大幅上調咗約26.6至38%。