有時真係幾唏噓，中港股市「融合」之前，即使港股內中資掛牌公司比例極高，但在外資眼中都算得上一個發展成熟市場。但自從滬港通正式開車之後，A股市場對港股影響愈來愈大，情緒化同大起大落，漸漸與港股畫上等號。

周三A股尾市狂抽，驅動港股出現一陣快速殺淡倉潮，昨日劇情調轉，A股尾市山泥傾瀉，拖累港股一小時內由高位22,203點跌至21,718點。

儘管本文早預期，議息前避險情緒高漲的基金經理，未必咁大方炒上去畀人食胡，也建議周三、四不宜持倉過夜，但類似神經刀一樣的梅花間竹玩法，對於破位追勢的期指客而言，搵食確實困難。

執筆時未知美國議息結果，但消息一旦明朗，有助延續港股短期反彈。恒指與國指比較，筆者較屬意博漸見擺脫A股影響的國期，一於等國期破萬點關，先補回一半倉底。

祈克