Fundman睇市：海爾電器值得留意

市場似乎已假設美國本周不加息，故此影響性變得有限，更重要是睇耶倫女士在記者會言論。在議息前夕，本地地產股先行腳軟，傳布局互聯網金融的騰訊（00700）升2.5%頂實大市，但下跌股數超過1,100隻，市場氣氛冇厘神氣，成交再縮至636億元，但未夠A股縮得勁，兩市加埋得4,776億人仔，猶幸港股近日同A股劃清界線，只是中國經濟若一路未見起色，港股都好難有作為。大和昨日更認為內地經濟已經是硬着陸，仲有幾年日子捱；而人民幣是救亦難不救亦難，睇見外匯佔款連月減幅破紀錄，代價可見不小。

國家隊死頂A股

滬綜指曾跌穿3,000點但收市險守，而深成指則已跌穿上次低位，政府救市救出個大頭佛。中證監澄清清理場外配資已完成六成，但即係仲有四成，最慘係周五結算的股指期貨經已冰封，大戶無法為下月股指期貨進行對沖，只有沽售現貨套現。雖然一些大戶仍可在新加坡A50期指沽空，但國家隊死頂實幾隻內銀A股，令A50指數跌幅未能反映整體市況。除非大戶重倉內銀股，否則在新加坡沽空亦難為現貨對沖風險。

此情況對散戶影響更為顯著，昨日再有700隻股票跌停，個個睇住滬綜指頂住3,000點未覺得大禍臨頭，但其實好多股票已跌至重傷，仲未計大批停牌「賴死」唔復牌股份。

個股欠缺睇頭，只有個別細價股有異動，排頭位是升逾倍的華泰瑞銀（08006），「華泰+瑞銀」喎！第二位是上市僅四日的順客隆（00974），但如果多人認購又點會益街坊？亦令人想起早幾月的集成控股（01027）。iPhone 6s首周銷售料破紀錄，最大概念股高偉電子（01415）急升7.8%，但瑞聲（02018）跌1%，其實瑞聲已跑贏大市好多。

在這種半死不活市況，史提芬會特別留意回購及增持名單，香港唔同祖國要揀ABCDE餐奉命回購或增持，大股東覺得股價抵買自然會出手。不過，近期買得最頻密的輝山乳業（06863）和恒發洋參（00911）卻不知葫蘆裏賣甚麼藥，因為睇估值並不便宜。

前日有回購的股份有十幾隻，當中包括領展（00823）在內的三隻REITs，現時收購商場等回報偏低，不如回購本身股份，增加每股盈利等於增加每股派息。其餘亦可留意隻海爾電器（01169），七年來首度回購，上次回購時仍係一隻毫子股（亦即雷曼剛剛爆煲後），其後獲阿里入股後，股價由舊年開始長踞20元樓上，但今年七月亦隨大市跳水，累跌約四成，除了因為上半年盈利增長12%，屬多年來首次唔夠兩成之外，阿里巴巴宣布入股電器零售商蘇寧並隨即展開合作，市場亦擔心會令其「失寵」。

日日順網絡佔優

海爾亦曾為此解畫，指旗下「日日順」專注三、四線城市，可謂定位不同。集團上半年業績的增長點仍在物流方面，但令投資者詫異的是渠道綜合服務竟錄得收入倒退，據解釋是佔分銷業務比重較高的冰箱及空調類銷售下滑，而業務正向利潤率較高的供應鏈平台增值服務轉型，線上線下業務亦進行融合，故此產生陣痛。

如果因為內地電商發展蓬勃而盲目看好相關股份並不值得，原因是競爭亦愈來愈激烈，阿里在美國股價同跌得慘烈，但不發展電商更是死路一條，連聯華超市（00980）亦開始「見紅」。海爾憑日日順網絡畢竟佔有優勢，公司有100億元人民幣現金（昨市值為350億元），預測市盈率降至10倍多，集團在此時刻運用豐厚現金進行回購便不為怪。

至於白色家電，冰箱和空調業務面對需求和價格戰影響，但海爾旗下洗衣機及熱水器業務仍錄得收入和分部利潤增長已算不俗，惟須關注分銷業務是否如管理層所言屬於「陣痛」，若下半年能回復增長勢頭，將可釋除市場疑慮。