Fundman睇市：培力控股現價唔貴

唔夠四個月，成個市氣氛一百八十度轉變，國企指數由高位14,962點，至上周五收市9,718點，累積跌幅三成五之多。以往股市短期出現超過兩成跌幅，點都有一兩次像樣的反彈，今次卻係着地無聲，彈都唔彈。

一來，都係怪阿爺暴力托市之初亂晒章法，結果搞到唔湯唔水，國際基金大戶抱有戒心，一些中港兩地都有參與的基金，因北面的有形之手支持，加上唔出貨同阿爺賣乖的理由，於是當正港股係提款機，形成持續的沽售壓力。

國企股乏人問津

參考現時國指成分股的平均市盈率大約6.9倍，同○八年金融海嘯最惡劣的日子睇齊，甚至稍低於○三年沙士價，論估值經已極度低殘。不過，今時唔同往日，現實所見，去年十一月人行貨幣政策由定點轉為全面放水，足有三季之久，實體經濟依然丁點未見起色，結合早排拙劣救市的後遺症，愈來愈多投資者懷疑中國經濟神話可唔可以再走落去。

過去兩次國企出現如此便宜估值，經濟與企業盈利都已接近、甚至開始谷底回升，可是今次卻似乎還未見到黑暗盡頭，加上人民幣的升值潮可能告一段落，使中資股本身較過往幾次股災，存在更大風險溢價，基金經理投資中國市場的興趣，幾乎跌至冰點。

雖然股市永遠唔會一條直線插落，目前國企股估值也是十分便宜，惟在下對於何時見底反彈，確實無乜把握，尤其銀行及資源股營收級級落之形勢，屬短期難以逆轉的一類，唔少基金連博反彈的興趣都欠奉。

今個星期，點都要睇住美國市做，聯儲局議息在即，但近排美國經濟數據除八月份失業率外，其餘普遍麻麻，九月消費信心意外跌返去近四個月低位，上月華爾街股市急跌，穿埋去年下半年低位15,885點，如此情況，在下認為聯儲局選擇睇多陣的機會依然比較大。

行業入門屏障高

最近有證券行唱好中藥顆粒市場，預期一四至一九年行業年增長有三成之多，一來行業相對規範化，而且政府禁止公立醫院大部分藥品加價，反之中藥配方顆粒未在禁加之列，有助顆粒市場發展，擴大在中藥市場中的滲透率。

現時全國產銷中藥顆粒牌照僅得六個，都是在○二至○四年發出，現時分屬五間公司，政府希望嚴格監控中藥顆粒市場的安全，故至今也再無發出新牌，且行業進入屏障愈來愈高，基本上已變了寡頭壟斷的生意，較受港人認識的是經營農本坊的培力控股（01498），以及今年年初以近84億元收購天江藥業逾八成股權的中國中藥（00570）。

培力算生不逢時，今年七月八日股災日以5.98元招股掛牌，首日慘見3.47元低位，嚇壞唔少捧場客，之後跟大市反彈，升至5.9元又再受阻，可以相信唔少認購基金見執番身彩，一貼近水面已經慌忙逃生，市況唔就開壞個頭實在無計，現價3.9元，一五年市盈率15倍左右，以中藥顆粒行業的短期增長計，現價唔貴，亦係少數有故事的增長股。

至於隻中國中藥，今年上半年持續經營業務的收入及純利分別升14.7%及29.2%，由於天江藥業交易尚未完成，計入之後，一六年將會有誇張的增長，一五年25倍左右的估值，估計會降至14至15倍。

兩股中，培力缺點係蟹貨多同成交比較疏，中國中藥流通情況則比較好，但股價又預先透支收購為業績帶來的好處，都係較宜等市況轉差或股價出現震盪之時才入手。