政府喺今季插隊推出嘅九龍大窩坪延坪道住宅地王將會喺今個禮拜五截標。呢幅地皮係今個財政年度賣地計劃「含金量」最高嘅土地，由於投資額龐大，劉Sir就覺得發展商未必會搶得好勁，相信以大型發展商同埋合組財團為主，而政府都特意提醒發展商地皮牽涉司法覆核程序，不過始終市區供應難求，有測量師老友預計估值可以逼近百億元，最高約莫94.86億元。

張翹楚相信，大型發展商及合組財團將投標。（資料圖片）

市區供應難求，本周五截標的大窩坪延坪道住宅地估值逼近百億元。（資料圖片）

本周截標住宅地王基本資料

劉Sir知道，呢幅大窩坪延坪道住宅地王佔地約莫21.96萬方呎，地積比率約2.88倍，計番總樓面就大約63.24萬方呎。

涉司法覆核程序

呢幅地皮原先係「綠化地帶」，但係為咗增加供應，政府早前就改劃做住宅用途，並且擺入賣地表，再加插喺今季賣地計劃之中。

而地皮改劃過程真係一波三折，諮詢期收到超過5,000份反對意見，雖然最後都獲通過改劃做住宅用途，殊不知上個月又遭入稟申請司法覆核。

地政總署喺土地招標後，都特意發出補充文件，提醒投標財團地皮牽涉司法覆核程序，仲話唔會為咗呢樣嘢對投標者帶嚟嘅損失負責。

不過，呢幅延坪道地皮始終係市區罕有供應，更加喺今個財政年度「含金量」最高嘅地皮，市場都覺得會順利批出。

出入車路僅一條

劉Sir老友戴德梁行張翹楚就咁睇，呢幅延坪道地皮質素唔錯，市區豪宅地向來穩陣，唯一考慮喺地皮位置上只有一條車路出入，會較為不便。張氏估計，每方呎樓面地價約1.2萬元，折合估值約75.89億元，佢相信投標財團以大型發展商同埋合組財團為主，標書數目未必會好多。

而中原對呢幅地皮嘅估值就最進取，預期每方呎樓面地價約莫1.5萬元，折合估值達約94.86億元，係市場上限價。

如果地皮最終以上限估值批出，屆時就會成為自一三年三月至今兩年半以嚟最貴重地王，而當時何文田常樂街與常盛街交界豪宅地，就以超過116.8億元批出。