中港股市今年內波譎雲詭，走勢猶如坐過山車，投資者經歷令人血脈沸騰的四、五月後，又遇上令人欲哭無淚的七、八月。若嫌散戶哭股喪的故事已聽得太多，今次就轉由股民平日「見慣見熟」的分析師向你剖白今年的個人投資秘聞。

港股近月走勢猶如坐過山車，投資者不妨參考一眾分析師的部署，準備應付後市。

沈振盈

沈振盈策略及後市看法

彭偉新

彭偉新策略及後市看法

鄧聲興

鄧聲興策略及後市看法

訊匯沈振盈 靠平保中信 回報仍有30%

有「沈大師」之稱的訊匯證券行政總裁沈振盈最近人氣爆燈，另邊廂，即使港股驚現一輪暴跌，其個人投資組合年內仍有兩至三成回報，可說是「人財兩得」，他直言，「今年帶挈賺得最多嘅係平保（02318）同中信股份（00267），要贏錢，兩注就夠晒喇﹗」

沽清正股 成功避險

去年底滬港通推出後，港股出現一輪回調，「因為堅信中央會利用股市帶動經濟、改善地方債問題同埋企業融資，再加埋舊年推出『新國九條』，所以預期港股會爆升，咪即刻趁低入市儲貨，主打內銀、內險股同其他中資股，之後一半長揸，一半炒波幅，整體組合喺最高峰賺過五、六成。」幸而，他在六月尾已沽清所有正股股份，只餘下約兩成資金短炒衍生工具，正好避過七、八月的大跌浪。

沈振盈年內股票投資額逾百萬元，他笑言，今年投資傾向保守，已不及九六至○○年時狠辣，怕炒輸賺不回來。「我鍾意喺低位儲貨，如果學似有啲人27,000點、28,000點先嚟瞓身咪大鑊？我最開心係喺平保（拆細前）60蚊樓下掃正股及Call輪（認購證），其後喺90幾蚊全數沽出獲利；而且三、四月喺中信股份13蚊時大手掃正股同Call輪，及後喺16蚊沽清，啲輪閒閒哋都賺十倍、八倍。」

小注炒輪 未急撈底

他近期已沒有持有任何正股，僅利用衍生工具「刀仔鋸大樹」，目前主力炒平保與中信股份Call輪，並不時以少量指數Put輪及牛熊證做對沖。「買入嘅窩輪主要係十月或十一月到期，大多數時間只係運用5至10%資金炒，若然趨勢明顯頂多都係玩三至五隻，避免轉唔切身同控制番風險。」

談到入市時機，他個人表明不會急於「撈貨」，主因市況暫未穩定，雖然不少股份中長線的價值浮現，惟短線仍受息口與資金流變化、去槓桿化等因素影響，最起碼需待美國落實是否加息，而內地推出可刺激經濟的行政措施，中港股市才可見底。

京華山一彭偉新 高峰曾倍賺 察見頂訊號

港股自三月底展開大時代，恒指在短期內飆升，無貨在手的投資者當時固然大呼「執輸」。惟京華山一研究部主管彭偉新早在去年十月已開始滿倉，「主因當時留意到市況開始轉強，便因應市場熱門的投資主題建倉，最高峰時整體投資組合賺逾一倍，惟及後跌市，所以盈利就還番畀佢喇」。

四月發現見頂訊號

彭偉新透露：「今年嘅市況真係完全預計唔到，上半年時真係買乜升乜，鐵路股、航運股，好似廣州廣船（現稱中船防務，00317），以至細價股我都有炒過，喺我確信升勢時，仲會運用孖展去炒添，回報最和味嘅係一啲實力股。」

不過，他於六月下旬由於有資金需要，便開始清倉，直至七月初大跌市便將全數持股沽出套現。「好彩提早沽貨，回報最終打個和，冇輸凸，已經算執番身彩啦﹗」

事實上，他在四月已留意到中港股市有見頂訊號。「然而，中央政府做埋晒啲唔應該做嘅嘢去試圖控制股市，逼機構投資者入市又唔畀沽貨，正因有政策風險，大家一見到中央護盤都唔敢玩，仲唔係趕客？再者，內地對抗唔到環球市況，一味掩耳盜鈴托市係挽回唔到市場信心。」

恒指恐下試17500

即使港股已經較四月高位下調逾7,000點，惟彭偉新直言：「大市冇翻生嘅曙光，現時我唔會考慮入市，一三年六月嘅低位，即係跌到19,400點時，恒指會出現首個明顯的反彈，但係大家都係一路彈一路走貨，其實熊市要跌足早前總升幅三分之二，先有機會見底，所以恒指未來首步會低見17,500點。」

君陽鄧聲興 工作太忙碌 僅押注基金

股評人日理萬機，君陽證券行政總裁鄧聲興笑言，每天既要上鏡參與財經節目的拍攝工作，回到公司又有排山倒海的會議及訪問，「邊夠膽放咁多錢炒股」。他去年底深感內地股市估值吸引，且預計中央勢激活股市，便動用投資組合近七成資金認購一隻大中華股票基金，上半年一度喜獲三成的回報，但目前幾乎「只得個吉」。

由於認為A股市值與內地居民存款比例並不合理，而且市盈率處於低水平，他原本估算A股今年可彈升至6,000點，驅使其投資該基金，他稱：「五、六月嗰陣收到基金嘅『成績表』好開心，一隻基金半年已經攞到三成回報，但係後來因為中央打擊場外配資等一系列政策，令股市急跌，隻基金依家只係得番幾個巴仙回報。」

IPO首掛揸一日獲利

鄧聲興利用餘下三成資金短炒細價股，此部分在六月時最多賺逾一倍，惟目前已回落至兩至三成回報。在新股及細價股炒風「最癲」的四至六月，他多番「食胡」，「因為冇咁好耐性，所以唔會抽新股，慣性只係掛牌首日追入，持貨一日沽貨獲利，當時建築股令我賺得較多，如果平均計，每隻都可以有兩至三成利潤嘅。」

他亦曾短炒有殼股概念與其他三、四線細價股，其中包括阿里系股份，但求旨在參與趁熱鬧，惟細價股卻也令他「心噏」，他說，「上兩個月炒過隻科網創業板股，搞到蝕咗兩、三成，好彩本金唔多咋。其實喺多國齊齊量寬之後，環球股市波動性俱增，冇得唔信邪，資金流動性對股市升跌影響好大，所以炒股一定要鎖定利潤，設止賺位。特別係玩細價股一定要更小心，有15至20%跌幅就要止蝕。」

伺機買內險基建股

談到未來投資部署，他坦言，仍看好內地股市，現時港股已具吸引力，惟市況仍未喘定，尚未為入市時機，在未來兩個月，一旦中港股市見底，個人便會伺機吸納績優的內險股，如國壽（02628），另預計內地將加大基建投資以推動經濟，所以亦打算收集基建股，如中國中鐵（00390）及中鐵建（01186）。