上周五內地休市，港股全日高低波幅仍有459點，不過方向就一樣，都係得個「跌」字。恒指跌94點報20,840點，國指則跌131點報9,169點，主板成交僅693億元，觀望氣氛濃厚。

至於期指日市收市跌87點報20,612點，低水229點，成交得僅5.3萬張，惟「好戲在後頭」，事關夜期已經係另一個世界，跌多192點，低水幅度擴大至421點，收報20,420點。

值得留意是，如果從日市與夜市的成交張數及跌幅作比較，可見夜期市場氣氛更加兇險！至於國期受內地股市休戰影響，收報9,006點，力守九千點關。

以為已經好慘？未算，因為上周五英法德三大歐股統統跌2%以上，而且美股再接力，道指跌多272點至16,102點收，睇怕今日中港兩地股市都要裂口低開。

策略上，考慮到內地今日復市，唔知北大人又會出甚麼招數應對，加上今晚美國勞動節假期休市，暫時都係睇多一日，少做少錯，一於以靜制動最實際。