北水動向：航空股低潮未過去

事實上，如今除咗中國經濟出問題之外，美國股市位高勢危，美息逆轉，全球資金大規模拆倉，震動非同小可。九月中旬聯儲局開會前，大家都有得震冇得瞓，既無章法可依，最自保當然係離場觀望，唔做唔錯！

國際油價跌咗咁耐，近日油組開腔對油價低迷表示關注，是否預示有減產行動，不得而知。但如今全球經濟生變，低速增長之餘，更要擔心中國經濟硬着陸，對石油需求面影響大，加上伊朗恢復出口石油，若油組少量減產，料刺激有限，故年底前國際油價走勢仍未許樂觀。

國航財務狀況較佳

油價下跌，理論上有利航空股，但問題係新的不明朗因素又出現，包括人民幣走貶，以及全球經濟不景。呢兩個新的不利因素若然真係發展成一個趨勢，油價低迷亦不足以完全抵銷負面影響。在三大中資航空股中，國航（00753）的國際航線比重較多，外幣收入與成本結構較佳，且美元債比例較低，財務狀況亦較強，在行業逆境之中，有能力跑贏同業。

至於南航（01055）與東航（00670），可說是半斤八両。本來以上海為基地的東航，享有明年首季迪士尼開幕的優勢，惟內地金融改革經歷今年的動盪後，步伐無可避免受阻滯，上海作為地區性金融中心的目標距離又拉遠了，東航的上海優勢亦告失色。至於南航，早前增持了具往返上海航線的廈門航空股權，同樣可分享迪士尼開幕商機，只是人民幣真的繼續走貶的話，三者中南航盈利所受的負面影響最大。但無論如何，現時航空股未到吸納時，相信今年的低位在末季才會出現。