周三筆者先話港匯強隨時是禍不是福，真係開口中，就算外圍似乎有些少起色，但睇怕中港股市都係無運行，滬綜指周三收報3,160點，在疑似國家隊力撐下仲叫做頂得住，但港恒指就跌250點，收報20,934點，主板成交略增至960億元。

最慘係期指日市跌深啲，收報20,699點，低水235點；到夜期又跌多59點報20,640點，成交張數增至8.2萬張，未平倉合約10.3萬張，無論睇現貨定期貨都係心慌慌。

走勢上，恒指八月十八日失守23,500點後，其後幾日皆裂口低開低收，走勢淡到爆，加上周三確認失守埋兩萬一，後市就算唔再大跌，但既然短期無大好消息刺激，好友要大力反攻亦不易，方向上都係睇跌為主，策略亦應逢高沽，惟考慮到內地休市，故亦不妨先休戰，等下周再部署。