樓價喺咁升，上車客焗買迷你單位，發展商見細碼盤好賣，自然起多啲應市。劉sir拎咗屋宇署資料計數，發現原來由今年頭六個月，動工私宅8,887伙單位，平均建築面積得708方呎，同去年同期比縮超過兩成；期間9個動工項目單位平均建築面積唔夠500方呎，涉及超過1,400伙，按年激增近倍。但學者預期，香港受內地經濟轉差拖累，息口又向上，到時樓價一跌，發展商自然唔再起細單位。

細碼盤近期有價有市，吸引不少發展商爭相建細單位應市。（資料圖片）

私人住宅動工量統計

市場成日都話發展商爭住起細單位，劉sir查番屋宇署去年一月至今年六月嘅資料，發現除咗私宅項目動工伙數爆升，由去年上半年3,053伙，急升至今年上半年8,887伙，升幅接近兩倍。

同時單位面積亦愈起愈細，扣除宿舍等非私宅樓面後，去年上半年動工項目平均建築面積約892方呎，下半年就約762方呎，今年上半年更縮到得708方呎，短短一年間縮細超過兩成。

恒地兩盤共涉723單位

劉sir仲發現，今年上半年平均建築面積不足500方呎動工私宅項目，涉及單位多達1,483伙，同舊年上半年781伙相比，多咗接近九成，當中主要來自恒地（00012）大角咀利得街11至33號項目A地盤，有成448伙，單位平均建築面積得300方呎。同系馬頭角道50號項目，亦都提供275伙平均建築面積得311平方呎細單位。

細戶成風料兩年逆轉

劉sir同學者老友傾開，城大建築及科技學部高級講師潘永祥就話，內地經濟近期開始倒退，隨時拖累本港經濟，近幾年市民搶細樓只係因為以目前樓價，一般市民根本買唔起五、六百呎樓，唯有買迷你單位。

不過，估計美國將加息，預期樓價未來兩年跌幅有兩、三成，買家最終會流返去中型單位，到時發展商興建迷你單位意欲都會低啲，所以估計新盤愈起愈細嘅現象，將僅持續約一至兩年。