北大人再發功，昨日臨近尾市推高滬綜指至3,205點收。港股更離奇，昨日高開低走後，恒指於現貨收市前一分鐘被挾高至21,787點，收報21,670點，臨近收市從跌轉升58點，主板成交944億元，其中「尾市一分鐘」成交已經有113億元。至於國指全日都有262點波幅，同樣在「尾市一分鐘」被挾高，收報9,741點，跌9點。

股權追蹤 2015/8/31

近期A股「人為托市」做到咁出面，港股跟一跟的「理由」可以很多。但未來炒即市，都要考慮埋臨近尾市有機會被挾上挾落的因素。九月期指日市收21,464點，跌72點，低水207點，成交縮至6.5萬張；國期收9,682點，跌74點，成交十萬張都無。

策略上，昨日早市按策略在9,750點以三分一資金小注沽國期，但午後見勢頭唔多對路，即刻在9,650點就平倉，叫做搵餐晏仔食吓，今日策略繼續逢高沽國期。另外，市場人心虛怯，睇怕恒指都係有波幅無升幅，如果短期重上10日線22,067點會考慮小注試沽，博跌番落早前低位21,060點，都有成千點利潤啦！