隔晚美股大幅波動，昨日中、港股市低開就梗了，恒指在死亡交叉即將出現前來個反彈，亦不足奇。不過，估唔到阿爺放軟手腳冇聲冇氣，滬綜指反彈乏力，插穿三千點關收市，呢份寂靜令股民冰涼透心！好在執筆時終於傳來人行減息降準，雖然來得有點晚，但遲到總好過冇到！

到底減息降準，係咪真係靈丹妙藥，對環球股市的刺激有多大，要做事後孔明。不過，筆者都係傾向保守啲，若然早前未及減持，應該好好把握反彈減持的機會，總之將持倉水平調節至可控範圍內，切忌以孖展博反彈，火中取栗唔成功，分分鐘變成火燒身！

主力留意重磅股

理論上，大跌市過後，首要留意的應該是重磅股而唔係二、三線股，皆因雖然股市大跌，但反映在經濟上須要一些時間，大企業業務暫時變化不大，但估值已在展望悲觀下作出大幅調整，只要股場氣氛冷靜下來，重磅股應該是較值博的，因為既可攻又可守。反觀次季熱炒的概念股，睇怕要較長時間整固，少做少錯。

近期油價不斷探底，煤價亦跟着跌。本來煤價下跌意味火電發電成本下降，有利電企毛利率表現。之不過，計及經濟增長顯著放緩之下，電力需求亦受拖累，故充其量只是利淡利好因素相抵銷，不能單單以煤價下跌來作為看好電力股的原因。

環顧五大中資電力股，潤電（00836）、大唐（00991）、華電（01071）及華能（00902），今年以來股價累跌幅度分別為9.3%、31%、18%及21%，僅中國電力（02380）仍有15%升幅，相信與憧憬注資有關。純睇走勢，中國電力昨日股價跌至250日線4.4元回穩，再下一個較大的承接區則在3.8至4元，反彈首站阻力在4.8元水平。