真係估唔到周初美股玩咁大，一個「華麗轉身」好淡友全部中招。港股昨日有樣學樣，恒指走勢反覆回穩，全日高低波幅逾千點，最後收市報21,404點，升153點，主板成交1,345億元。

昨日最大亮點係北大人收市後竟然宣布雙降，今次又唔知可以撐個市幾耐，仲隨時愈幫愈忙！講番期指，臨近結算又再大起大落，日市收21,575點，升447點，高水170點，成交高達14.1萬張，而未平倉合約達10.3萬張，九月期指都有3.8萬張成交，睇怕結算前好淡友隨時「再開片」！至於國期就無咁風光，日市收9,620點，升得24點。無他，滬綜指跌穿「三千金身」，短期彈唔返上去，後市仲係凶多吉少。

策略上，昨日港股無受美股周一的瘋狂而急插，反而畀大戶撐高指數散貨，既然期指咁難估，後市都係轉沽國期即市，起碼有內地股市抽後腿，要彈都無咁爽，逢彈至9,850點邊就沽，升穿一萬點止蝕，到9,400點就食胡，密食當三餐好過。