前晚，聯儲局公開上次會議紀錄，口脗同預期差唔多，大部分委員認為經濟已接近加息條件，但礙於通脹唔高，且全球經濟低迷所帶來的風險，對九月啟動加息，並未有一致共識。事實上，有投票權委員僅得一位支持上月開始加息，會議綱要一出，利率期貨顯示九月加息機會跌至三成三。

港股今年波幅已不小，後市再跌空間相信有限。（資料圖片）

自從上周二中國來個突襲式匯率貶值，話就話一次性質，但去年十一月人行減息開始，經濟屢托無效，七月再來一個股災，全年保七變得危危乎，將人民幣貶值，等於將通縮與經濟問題一次過輸出，要全世界幫手找數。

美國進口中國貨品貶值，意味通脹壓力大減，聯儲局投鼠忌器，睇多一兩個月至加息絕對唔出奇。十年美債息六月份在2.5厘水平見頂後級級落，預告債商都睇美息中短期加幅有限，史提芬大膽估計，在中國及新興市場匯率風暴，加埋大宗商品價插極未見底情況下，今年美國加唔到息機會，應該高過五成。

蟹貨需時消化

睇住個市認真唔開胃，基金經理依家當正港股係天津爆炸後嘅山埃水氹一樣，掂吓都死，齊齊沽之而後快，尋日恒指輕鬆跌穿七月八日股災低位22,836點，最後跌410點，收22,757點，營造高低腳不成，反而破底直插。

股民都會想問，究竟後市個底喺邊度？毫無疑問，經歷滬港通、A股狂牛加埋憧憬中國大媽掃貨，三服興奮劑一齊隊，港股好不容易先破到25,000點的海嘯後高位，去到28,588點，四月大時代持續在兩萬七、八，千幾兩千億成交引了大批生力軍落疊，恐怕今次唔係一年半載可以消化到咁多蟹貨，今年甚至明年返唔到28,588點，幾乎已成事實。

個市愈玩愈悲情，經已聽到有人講後市會變○七年翻版，當年直通車撻Q，恒指由31,958插至10,676點，一插就唔見兩萬點，悲成咁，小弟未敢苟同。樂觀去睇，當年港股高位24倍市盈率，今浪高位係12.5倍左右，跳樓比喻，照計今次天台離地面近啲。

用○九年後港股的全年高低波幅比較，今年恒指波幅行咗5,831點，已多過一二至一四年期間的4,662、4,680及4,225點，接近一○年的6,017點水平。若然重演一一年因歐債危機，美、歐齊齊被調低信貨評級般，結果港股先高後低，交出8,298點波幅，以此計算，低位會去到20,290點，相當於9.4倍市盈率，比過往十年歷史平均12.8倍，折讓兩成六。

主觀認為，這機會應該低於三成，一來中國減息的刺激應該在第三、四季陸續浮現，由人仔貶值令美國有意再延遲加息的舉動看，港股現水平雖未至於可以立即瞓身搏命，但再大跌的風險應該已經大減，早前能夠全身而退，以逸代勞的，未來兩個月可以考慮入番多少受惠國企改革的國企，以及業務防守性強的中資電訊股。

濠賭股未見底

講番個市，尋日十三隻藍籌創五十二周低，煤、油等資源股外，澳門博彩收入每況愈下，兩隻濠賭股齊齊插水，金沙（01928）及銀娛（00027）分別跌3.6%及6%，走勢差過大市。

老友過完大海返嚟，話暑假關係，澳門仲係人頭湧湧，但大額賭廳靜英英。反貪加埋A股股災之後，似乎去搏殺的內地客真係少咗咁話。今年新一批博彩度假村陸續開幕，早排瑞銀報告話因賭客減少，新開賭枱數目比預期少，似乎下半年競爭會更白熱化，撈底都係另作他選。